FLASH
Shkruar nga Pamfleti
Problemet para nisjes së Botërorit 2026 vazhdojnë të shtohen, ndërsa pjesëmarrja e Iranit në turne mbetet seriozisht në pikëpyetje. Situata politike dhe tensionet mes Shteteve të Bashkuara dhe Iranit po konsiderohen si pengesa kryesore që mund ta bëjnë të pamundur praninë e kombëtares iraniane në kompeticionin më të madh të futbollit.
Sipas raportimit të “The Athletic”, FIFA po shqyrton disa alternativa për të zgjidhur situatën, ndërsa një nga skenarët që po fiton gjithnjë e më shumë terren është organizimi i një “play-off”-i ndërkombëtar për të përcaktuar skuadrën që do të zëvendësonte Iranin në rast përjashtimi.
Formula e propozuar parashikon pjesëmarrjen e katër skuadrave: dy kombëtare europiane me koeficientin më të lartë që kanë mbetur jashtë Botërorit përmes “play-off”-it, konkretisht Italia dhe Danimarka, si dhe dy përfaqësuese aziatike me renditjen më të mirë.
Katër skuadrat do të përballeshin në dy gjysmëfinale dhe më pas në një finale, nga ku do të dilte ekipi fitues që do të siguronte biletën për në Botërorin 2026.
Një precedent i ngjashëm është regjistruar edhe nga vetë FIFA para Botërorit të Klubeve vitin e kaluar, kur organizata përjashtoi klubin Leon dhe vendosi zhvillimin e një “play-off”-i mes Club America dhe Los Angeles FC për të përcaktuar zëvendësuesin.
Megjithatë, mbetet edhe një alternativë tjetër në tryezë. FIFA mund të zgjedhë të mos organizojë një “play-off” dhe t’ia japë drejtpërdrejt vendin një kombëtareje aziatike. Në këtë rast, Emiratet e Bashkuara Arabe konsiderohen favoritët kryesorë për të përfituar nga situata.
Sipas raportimeve, vendimi final pritet të merret javën e ardhshme. Rregullorja parashikon që të gjitha vendet pjesëmarrëse në Kupën e Botës duhet të konfirmojnë zyrtarisht dhe në mënyrë të pakthyeshme pjesëmarrjen e tyre jo më vonë se 30 ditë para ndeshjes hapëse të turneut, e cila është planifikuar të luhet më 15 qershor.
Lini një Përgjigje