FLASH
Shkruar nga Pamfleti
Shtëpia e Bardhë ka konfirmuar se presidenti amerikan Donald Trump zhvilloi një bisedë telefonike me presidentin rus Vladimir Putin. Sipas administratës amerikane, biseda mes dy liderëve u konsiderua si pozitive, ndërsa Kremlini ka njoftuar se një tjetër telefonatë mes tyre pritet të ndodhë shumë shpejt. Në fokus të komunikimit ka qenë procesi i negociatave për paqe në Ukrainë dhe pozicionimi i palëve për një marrëveshje të mundshme për përfundimin e luftës.
Trump, nga rezidenca e tij në Mar-a-Lago, ka deklaruar se do të informojë presidentin rus mbi takimin që zhvilloi mbrëmë me presidentin ukrainas Volodymyr Zelensky, gjithashtu në Florida. Nga ana tjetër, këshilltari i Kremlinit për politikën e jashtme, Yuri Ushakov, ka bërë të ditur se Putin ka shprehur vullnet për të bashkëpunuar me SHBA në drejtim të një marrëveshjeje paqeje, por një sulm i fundit ndaj rezidencës së tij në rajonin e Novgorod ka ndikuar në rivlerësimin e qëndrimeve të tij.
Presidenti ukrainas Zelensky ka deklaruar se e konsideron thelbësore praninë e trupave ndërkombëtare në territorin e Ukrainës si pjesë e garancive të sigurisë për çdo marrëveshje që do të synojë përfundimin e luftës. Në takimin me Trump, ai kërkoi garanci sigurie për një periudhë prej 50 vitesh. Megjithatë, drafti aktual i propozuar parashikon garanci amerikane për 15 vjet, ndërsa forma e këtyre garancive mbetet ende e paqartë.
Zelensky ka theksuar se Ukraina kërkon garanci të ngjashme me nenin 5 të NATO-s, ku çdo sulm ndaj saj do të trajtohej si një sulm ndaj vendeve aleate. Ai theksoi se versioni i përditësuar i planit prej 20 pikash për paqen është pranuar në parim nga SHBA, me dakordësi të plotë nga pala ukrainase dhe me rezervë të lehtë nga ana e Trump, i cili e vlerësoi dakordësinë në rreth 95%.
Takimi në Florida është konsideruar si i frytshëm nga të dy palët, edhe pse presidenti Trump ka paralajmëruar se mbeten disa çështje të ndërlikuara të pazgjidhura, përfshirë statusin e territorit të Donbasit, ku Rusia ka kontroll të konsiderueshëm. Ai nënvizoi se zona mund të shndërrohet në një territor të çmilitarizuar, por një vendim përfundimtar për këtë pritet brenda disa javësh.
Ndërkohë, liderët evropianë kanë deklaruar gatishmërinë për të udhëhequr një forcë shumëkombëshe në Ukrainë, si pjesë e propozimit amerikan për një marrëveshje paqeje. Në këtë nismë janë përfshirë Britania, Franca, Gjermania dhe tetë vende të tjera, të cilat synojnë të kontribuojnë me trupa për të ndihmuar në rindërtimin e kapaciteteve të mbrojtjes së Ukrainës, sigurinë ajrore dhe mbrojtjen detare, përfshirë edhe operacione të mundshme brenda territorit ukrainas.
Lini një Përgjigje