FLASH
Shkruar nga Pamfleti
Pas më shumë se shtatë dekadash, një ekip kërkimor ka lokalizuar në fund të Oqeanit Atlantik rrënojat e fluturimit Pan Am 526A, një nga aksidentet më të njohura në historinë e aviacionit civil.
Avioni u zbulua më 2 qershor në një thellësi prej rreth 600 metrash, afërsisht 8 kilometra larg brigjeve të San Juanit në Porto Riko. Zbulimi u bë me një mjet nëndetar autonom të pajisur me sonar dhe kamera me rezolucion të lartë, i cili skanoi zonën për disa ditë.
Sipas The New York Times, në pamjet e para dallohen qartë logoja e kompanisë Pan Am, pjesë të trupit të avionit, sistemi i uljes dhe dritaret e kabinës. Një pjesë e konsiderueshme e avionit është ruajtur në gjendje të mirë.
Fluturimi, i njohur si "Easter Special", ishte nisur më 11 prill 1952 nga San Juani drejt Nju Jorkut. Vetëm nëntë minuta pas ngritjes, dy nga katër motorët e avionit Douglas DC-4 dolën jashtë funksionit.
Piloti tentoi të kthehej në aeroport, por humbja e vazhdueshme e lartësisë e detyroi të kryente një ulje emergjente në Oqeanin Atlantik.
Të 69 personat në bord i mbijetuan përplasjes me ujë. Megjithatë, pak minuta më vonë pjesa e pasme e avionit u shkëput dhe trupi i tij filloi të fundosej.
Gjatë evakuimit shpërtheu paniku. Sipas hetimeve të kohës, shumë pasagjerë nuk iu bindën urdhrave të pilotit për të braktisur avionin, ndërsa të tjerë qëndruan në kabinë për shkak të dallgëve të forta dhe frikës nga peshkaqenët.
Si pasojë, 52 persona humbën jetën, kryesisht nga mbytja, ndërsa 39 trupa nuk u gjetën kurrë.
Ky aksident u konsiderua një pikë kthese për aviacionin civil. Në atë periudhë nuk ishte e detyrueshme që pasagjerët të informoheshin për procedurat e sigurisë para ngritjes. Pas tragjedisë u vendosën rregulla të reja për demonstrimet e sigurisë dhe evakuimin në raste emergjente, procedura që zbatohen edhe sot në fluturimet komerciale.
Ekipi kërkimor bëri të ditur se nuk planifikon të nxjerrë rrënojat nga fundi i detit dhe as të kërkojë mbetje njerëzore, duke e konsideruar vendin një memorial të tragjedisë.
Lini një Përgjigje