FLASH
Shkruar nga Pamfleti
Teherani i cilëson "joprofesionale" dhe "të papranueshme", ndërsa Parisi akuzon shërbimet iraniane për ndalimin dhe marrjen në pyetje të diplomatëve.
Tensionet diplomatike mes Iranit dhe Francës janë rritur, pasi ministri i Jashtëm iranian, Abbas Araghchi, dënoi atë që e cilësoi si sjellje "jokonvencionale" dhe "joprofesionale" të dy diplomatëve francezë të akredituar në Teheran.
Gjatë një bisede telefonike me homologun e tij francez, Jean-Noël Barrot, Araghchi tha se veprimet e diplomatëve janë "të papranueshme" dhe theksoi se misionet e huaja diplomatike duhet të respektojnë ligjet e vendit pritës dhe normat ndërkombëtare të diplomacisë.
Megjithatë, ministri iranian nuk dha detaje mbi veprimet që, sipas Teheranit, kanë shkaktuar reagimin e autoriteteve.
Nga ana tjetër, ministri i Jashtëm francez deklaroi një ditë më parë se dy diplomatët francezë ishin ndaluar nga shërbimet iraniane të sigurisë gjatë fundjavës dhe ishin marrë në pyetje për disa orë.
Barrot e cilësoi ngjarjen si një "akt jashtëzakonisht serioz intimidimi" ndaj përfaqësuesve diplomatikë francezë.
Incidenti është zhvillimi më i fundit në marrëdhëniet e tensionuara mes Teheranit dhe Parisit, ndërsa deri tani asnjëra palë nuk ka bërë publike detaje të mëtejshme mbi rrethanat e ngjarjes.
Lini një Përgjigje