FLASH
Shkruar nga Pamfleti
Kryeministri izraelit Benjamin Netanyahu ndodhet sot në shtetin e Floridës, ku pritet të takohet pasditen e së hënës me presidentin amerikan Donald Trump në rezidencën Mar-a-Lago. Ky takim zhvillohet në një moment të ndjeshëm për Lindjen e Mesme, me krizën në Rripin e Gazës ende të pazgjidhur plotësisht dhe tensionet me Iranin në rritje.
Netanyahu, ka zhvilluar paraprakisht disa takime të rëndësishme me zyrtarë të administratës amerikane. Ai është takuar me Sekretarin e Shtetit Marco Rubio, si dhe me këshilltarë të afërt të Shtëpisë së Bardhë për Lindjen e Mesme, përfshirë Steve Witkoff dhe Jared Kushner. Bisedimet e zhvilluara janë përqendruar kryesisht në përpjekjet për të ecur përpara me fazën e dytë të planit të armëpushimit në Gaza dhe në nevojën për të garantuar sigurinë e Izraelit përballë kërcënimeve të jashtme, në veçanti nga Irani dhe milicitë e tij të lidhura në Siri dhe Liban.
Takimi me Trump pritet të jetë vendimtar për koordinimin politik dhe ushtarak mes dy vendeve në një kohë kur pozicionet ndërkombëtare për krizën në Gaza mbeten të fragmentuara. Netanyahu kërkon që Uashingtoni të mbështesë fuqimisht hapat e mëtejshëm të ndërhyrjes në Gaza, veçanërisht në aspektin e kontrollit mbi zonat e çliruara dhe krijimit të një administrate të qëndrueshme pas konfliktit.
Kjo është hera e parë që Netanyahu takohet me Trump pas rikthimit të këtij të fundit në Shtëpinë e Bardhë, dhe vlerësohet si një moment kyç për të përcaktuar drejtimin që do të marrë diplomacia izraelito-amerikane në muajt në vijim.
Lini një Përgjigje