FLASH
Shkruar nga Pamfleti
Mesfushori Enis Shabani pritet të jetë një nga emrat më të përfolur gjatë merkatos së verës, pasi disa klube të njohura të kampionatit kroat kanë shfaqur interes për shërbimet e tij.
23-vjeçari, i cili në fillim të sezonit u largua nga Mainci në Gjermani për t’iu bashkuar Vukovarit, ka spikatur me paraqitjet e tij në elitën kroate. Pavarësisht se skuadra e tij rrezikon seriozisht rënien nga kategoria, performanca individuale e Shabanit ka tërhequr vëmendjen e disa ekipeve rivale.
Sipas raportimeve të “Index.hr”, klubet Slaven Belupo, Osijek, Istra, Gorica, Lokomotiva Zagreb dhe Rijeka janë të interesuara për transferimin e mesfushorit gjatë verës. Një lëvizje e tillë do të përbënte një hap të rëndësishëm në karrierën e tij.
Në aspektin ndërkombëtar, Shabani ka qenë pjesë e përfaqësueseve të moshave të Gjermanisë, por më pas zgjodhi të përfaqësojë Shqipërinë U21, me të cilën ka zhvilluar disa ndeshje në kualifikueset e Europianit. Një transferim në një klub më konkurrues në Kroaci mund të rrisë shanset e tij për t’u ftuar në të ardhmen në Kombëtaren A të Shqipërisë.
Lini një Përgjigje