FLASH
Shkruar nga Pamfleti
Shqipëria ka siguruar dy medalje në Kampionatin Botëror të Peshëngritjes që po zhvillohet në Ismailia, falë paraqitjes së Enkileda Carjas. Sportistja 18-vjeçare garoi në kategorinë 69 kg, ku arriti të ngjitet dy herë në podium, duke shënuar një tjetër rezultat pozitiv për sportin kuqezi.
Nën drejtimin e trajneres Eglantina Kalemi, Carja demonstroi nivel të lartë në një konkurrencë të fortë ndërkombëtare. Paraqitja e saj në Egjipt konsiderohet vijimësi e rezultateve të mira të mëparshme, ndërsa së fundmi ajo është vlerësuar edhe me çmimin “Ylli në ngjitje” i Europës.
Gjatë garës, sportistja shqiptare u dallua për qetësinë dhe saktësinë në ngritje, duke përfaqësuar Shqipërinë në arenën botërore. Medaljet iu dorëzuan nga presidenti i Federatës Shqiptare të Peshëngritjes, Elez Gjoza, në një moment që u cilësua si krenari për delegacionin shqiptar.
Sipas Federatës Shqiptare të Peshëngritjes, ky rezultat është një tjetër sinjal pozitiv për zhvillimin e këtij sporti në vend.
“Ky sukses është dëshmi e punës së vazhdueshme dhe vizionit të Federatës Shqiptare të Peshëngritjes për zhvillimin e talenteve të reja, si dhe një sinjal i qartë se Shqipëria po ndërton kampionë për të ardhmen. Rruga vazhdon dhe Shqipëria vazhdon të ngrejë lart flamurin e saj në arenën ndërkombëtare”, thuhet në reagimin e Federatës.
Lini një Përgjigje