FLASH
Shkruar nga Pamfleti
Prishtina është kthyer sot në një qendër të rëndësishme të grumbullimit të shqiptarëve, teksa tifozë nga vende të ndryshme kanë mbërritur në kryeqytetin kosovar për të ndjekur nga afër ndeshjen vendimtare të përfaqësueses së Kosovës kundër Turqisë.
Interesi për këtë përballje ka qenë i lartë. Në rrugët e qytetit shihen tifozë të veshur me simbole kombëtare, duke mbajtur flamuj dhe duke shoqëruar atmosferën me instrumente tradicionale si tupana. Në mesin e tyre janë të pranishëm edhe tifozë të ekipit turk, ndërsa deri në këto momente nuk janë raportuar incidente.
E gjithë Prishtina duket e përfshirë nga atmosfera festive, ndërsa ndeshja do të nisë në orën 20:45 në stadiumin “Fadil Vokrri”.
Stadiumi “Fadil Vokrri”, me rreth 14 mijë vende, pritet të mos i përmbushë kërkesat e mëdha të tifozëve për këtë përballje. Interesi i lartë reflekton rëndësinë e ndeshjes, e cila mund t’i sigurojë Kosovës një vend në grupet e Kupës së Botës 2026.
Ndeshja ka tërhequr gjithashtu mijëra tifozë nga Shqipëria, të cilët janë bashkuar me qytetarët e Kosovës dhe shqiptarë të tjerë nga diaspora. Në qytet dëgjohen thirrje dhe këngë në kor, “Kosova është zemra e Shqipërisë”, ndërsa festimet shoqërohen me valle tradicionale dhe valëvitje të flamujve kombëtarë dhe atyre të Kosovës.
Lini një Përgjigje