FLASH
Shkruar nga Pamfleti
Sipas një raporti të inteligjencës amerikane, përshkallëzimi i operacioneve izraelite në Liban mund të rrezikojë marrëveshjen e paqes të ndërmjetësuar nga SHBA-ja me Iranin dhe të tensionojë marrëdhëniet mes Benjamin Netanyahut dhe Donald Trumpit...
Shërbimet amerikane të inteligjencës kanë paralajmëruar administratën e presidentit Donald Trump se kryeministri izraelit Benjamin Netanyahu mund të ndërmarrë veprime që do të dëmtonin përpjekjet për një marrëveshje të qëndrueshme paqeje mes Shteteve të Bashkuara dhe Iranit, raportoi The Washington Post.
Sipas raportimeve të inteligjencës, Izraeli duket i vendosur të vazhdojë operacionet ushtarake kundër Hezbollahut në Liban, një zhvillim që do të binte ndesh me një element kyç të marrëveshjes së fundit, e cila parashikon ndërprerjen e luftimeve në vend. Zyrtarë amerikanë, të cituar nga gazeta, thanë se një nga raportet më të fundit është shpërndarë gjatë kësaj jave.
The Washington Post vëren se vlerësimi i inteligjencës amerikane vjen në një periudhë tensionesh në rritje mes qeverisë së Netanyahut dhe administratës Trump. Zyrtarë amerikanë kanë paralajmëruar publikisht Izraelin të shmangë sulmet kundër Hezbollahut.
Të premten, Izraeli kreu sulme ajrore në jug të Libanit si përgjigje ndaj një sulmi me dron të Hezbollahut, i cili shkaktoi vdekjen e katër ushtarëve izraelitë. Në të njëjtën kohë, zyrtarë amerikanë dhe iranianë njoftuan shtyrjen e bisedimeve që pritej të zhvilloheshin në Zvicër, ndërsa zëvendëspresidenti amerikan J.D. Vance anuloi udhëtimin e tij drejt këtij vendi.
Rreziku për marrëdhëniet Netanyahu–Trump
Sipas gazetës amerikane, nëse Netanyahu zgjeron operacionet ushtarake në Liban, ai jo vetëm që do të rrezikonte zbatimin e marrëveshjes së nënshkruar mes SHBA-së dhe Iranit, por mund të dëmtonte edhe marrëdhënien me Trumpin, i cili ka luajtur një rol të rëndësishëm në karrierën e tij politike.
Një raport i ri i inteligjencës amerikane arrin në përfundimin se mbijetesa politike e Netanyahut, përpara zgjedhjeve kombëtare që pritet të mbahen këtë vjeshtë në Izrael, varet nga aftësia e tij për t’i treguar opinionit të brendshëm se nuk do të tërheqë trupat nga Libani dhe se mbetet i gatshëm të përshkallëzojë përballjen me Hezbollahun.
Raporti përshkruan gjithashtu pakënaqësinë e Izraelit me kushtet e memorandumit të paqes të promovuar nga Trump, të cilat sipas autoriteteve izraelite dobësojnë strategjinë e presionit maksimal ndaj Teheranit.
Sipas një ish-zyrtari amerikan, Izraeli shqetësohet se marrëveshja mund të kufizojë aftësinë e tij për t’u mbrojtur nga Hezbollahu. Nga ana tjetër, zyrtarët e administratës Trump argumentojnë se kushtet e marrëveshjes nuk e pengojnë Izraelin të përgjigjet në rast sulmesh dhe se përfundimi i marrëveshjes mbetet prioritet për të shmangur një krizë globale ekonomike dhe për të garantuar hapjen e ngushticës së Hormuzit.
Raporti paralajmëron se çdo armëpushim apo tërheqje izraelite nga Libani mund të perceptohet në Izrael si një humbje politike për Netanyahun.
Një zyrtar i lartë i qeverisë izraelite, duke komentuar analizën e inteligjencës amerikane, deklaroi se aktiviteti ushtarak i Izraelit në Liban synon ekskluzivisht mbrojtjen e qytetarëve izraelitë nga sulmet e vazhdueshme të Hezbollahut.
Megjithatë, sipas një zyrtari tjetër amerikan, edhe nëse Izraeli nuk zgjeron operacionet ushtarake në periferi të Bejrutit, refuzimi për të tërhequr trupat nga jugu i Libanit mund të rrezikojë seriozisht marrëveshjen e brishtë mes SHBA-së dhe Iranit.
“Vazhdimi i pranisë ushtarake në pjesë të Libanit është një formulë për dështim. Pa një tërheqje të plotë izraelite, rikthimi i përplasjeve mes ushtrisë izraelite dhe Hezbollahut është pothuajse i pashmangshëm”, citohet të ketë deklaruar ai.
Sipas The Washington Post, presidenti Trump disponon mjete të rëndësishme presioni ndaj Izraelit. SHBA-ja mund të kufizojë furnizimin me municione, karburant për aviacionin dhe mbështetje teknike, të pezullojë shkëmbimin e informacioneve të ndjeshme ose të reduktojë praninë e forcave amerikane që aktualisht kontribuojnë në mbrojtjen e hapësirës ajrore izraelite.
Gazeta thekson se presidentët amerikanë tradicionalisht kanë shmangur përdorimin e masave të tilla, megjithëse në periudha tensioni me qeveritë izraelite janë ndërmarrë herë pas here hapa të ngjashëm.
Lini një Përgjigje