FLASH
Shkruar nga Pamfleti
Çmimet shumë të larta të biletave për Kupën e Botës 2026 kanë vënë FIFA-n nën hetim në Shtetet e Bashkuara.Prokurorët e përgjithshëm të Nju Jorkut dhe Nju Xhersit kanë nisur një proces verifikimi mbi praktikat e shitjes së biletave dhe ndryshimet e bëra në hartat e ulëseve në stadiumin MetLife, ku do të zhvillohen disa nga ndeshjet më të rëndësishme të turneut.
Të mërkurën, Prokurorja e Përgjithshme e Nju Jorkut, Letitia James, dhe homologja e saj nga Nju Xhersi, Jennifer Davenport, njoftuan se kanë kërkuar dokumentacion nga organizatorët e FIFA-s për mënyrën si janë menaxhuar çmimet dhe shpërndarja e vendeve në stadium.
Sipas autoriteteve, ekzistojnë dyshime se tifozët mund të jenë mashtruar lidhur me vendet që kishin blerë, ndërsa deklaratat publike dhe publikimet e FIFA-s mund të kenë ndikuar në rritjen e çmimeve të biletave.
Hetimi fokusohet te ndryshimet e bëra në strukturën e ulëseve në stadiumin MetLife pas nisjes së shitjes së biletave. Fillimisht, stadiumi ishte ndarë në katër kategori, ku kategoritë me numër më të ulët konsideroheshin më të favorshme për shikuesit.
Megjithatë, sipas prokurorëve, FIFA krijoi më pas “zona të reja” duke shtuar seksione të përparme në secilën kategori. Tifozët pretendojnë se blerësit e biletave për këto zona të reja nuk morën vendet e premtuara dhe u zhvendosën në pozicione më pak të favorshme, përfshirë vende larg fushës ose pas portave.
Sipas raportimeve të “New York Times”, çmimet për ndeshjet e fazës së grupeve në SHBA nisnin nga 60 dollarë për një numër të kufizuar biletash dhe arrinin mbi 600 dollarë. Ndërsa për finalen, biletat me çmim nominal shkonin deri në 10,990 dollarë.
Pakënaqësia e tifozëve është shtuar edhe më shumë nga tregu i rishitjes, ku disa bileta për finalen janë ofruar deri në 2 milionë dollarë.
Në reagim ndaj kritikave, kryebashkiaku i New York-ut, Zohran Mamdani, njoftoi javën e kaluar një iniciativë për të ofruar bileta me çmim 50 dollarë për banorët e qytetit.
“Të jesh i sinqertë në lidhje me shitjen e biletave nuk është e komplikuar”, deklaroi Prokurorja e Përgjithshme e Nju Xhersit, Jennifer Davenport.
“Por FIFA e ka shndërruar blerjen e një bilete për Kupën e Botës në një turmë konfuzioni, mungesë të rreme dhe çmime tepër të larta”, shtoi ajo.
Edhe Prokurorja e Përgjithshme e Nju Jorkut, Letitia James, kritikoi situatën, duke theksuar se qytetarët “meritojnë një mundësi të drejtë për bileta të përballueshme” dhe se “tifozët duhet të jenë në gjendje të besojnë se biletat që blejnë do të jenë ato që marrin”.
FIFA nuk ka reaguar ende zyrtarisht ndaj kërkesës së CNN për koment mbi hetimin. Megjithatë, organizata kishte deklaruar më herët se “strategjia e saj e çmimeve përfshin një gamë të gjerë çmimesh dhe kategorish, duke reflektuar kërkesën e tregut për secilën ndeshje”.
Ndërkohë, edhe Prokurori i Përgjithshëm i Kalifornisë, Rob Bonta, ka kërkuar informacion nga FIFA për të verifikuar nëse gjatë procesit të shitjes së biletave janë shkelur ligjet e shtetit të Kalifornisë.
Kupa e Botës 2026 do të organizohet nga Shtetet e Bashkuara, Kanadaja dhe Meksika. Turneu nis më 11 qershor 2026, ndërsa stadiumi MetLife në New Jersey do të presë tetë ndeshje, përfshirë edhe finalen e madhe më 19 korrik.
Lini një Përgjigje