FLASH
Shkruar nga Pamfleti
Analisti Neritan Sejamini është shprehur se qeveria ka fryrë administratën publike jashtë çdo logjike ekonomike, edhe pse me digjitalizimin e shërbimeve, duhen më pak njerëz dhe këtyre më pas i rriten rrogat.
I ftuar në emisionin “Të Pa ekspozuarit”, Sejamini ju drejtua sekretarit të Përgjithshëm të PS-së, Damian Gjiknuri, se vendin jonë ka përqindjen më të lartë të të punësuarve në administratë, duke zënë vendin e 4-të në botë.
“Numri i punonjësve të qeverisë është rritur jashtë mase vitet e fundit, ka shkuar rreth 185 709 nëpunës publikë. Të punësuar gjithsej janë 720 mijë. Pra 26 për qind e të gjithë të punësuarve në Shqipëri, janë në sektorin publik. Shqipëria është e katërta në botë, pas Suedisë, Danimarkës dhe Finlandës, për përqindjen e punonjësve në sektorin publik.
Ju e keni fryrë administratën publike, megjithëse një pjesë të shërbimeve e keni digjitalizuar, pra ka nevojë për më pak njerëz, dhe nga ana tjetër keni rritur punësimin në rekorde evropiane, si vendet e zhvilluara veriperëndimore dhe këtyre pastaj ju u rritni rrogat. Nuk ka të bëjë me cilësinë”, tha Sejamini.
Gjithashtu Sejamini tha se e sheh me skepticizëm edhe premtimin e kryeministrit se gjysmën e parave të fushatës do ti shpenzojë për të mbjellë pemë, pasi sipas tij për fushata elektorale partitë përdorin para nga burime të padeklaruara.
“Financimi i partive politike është një nga problemet kryesore në Shqipëri. PS ka deklaruar se për vitin 2021 fushata u ka kushtuar 1.2 milionë euro. Ju po thoni se me paratë e fushatës do t’i mbillni pemë, por ne do të shikojmë kur të mbarojë fushata se ka keni harxhuar. Por nëse ju këto para i harxhoni për të mbjellë pemë dhe nga ana tjetër harxhoni miliona euro të padeklaruara, dilni edhe pemëdashësh dhe gjelbërues të Shqipërisë dhe nga ana tjetër harxhoni para nga të gjitha burimet. Ju mburreni se do të harxhoni 400-500 mijë euro për të mbjellë pemë dhe 500 mijë të tjera për të bërë fushatë, unë ngre duart”, tha ai.
Lini një Përgjigje