FLASH
Shkruar nga Pamfleti
Liderët e BE-së konfirmojnë mbështetjen për Ballkanin Perëndimor dhe theksojnë integrimin gradual të rajonit gjatë procesit të anëtarësimit...
Këshilli Evropian do të zhvillojë një diskutim strategjik mbi zgjerimin e Bashkimit Evropian dhe reformat përkatëse në mbledhjen e tij të planifikuar për tetor 2026. Vendimi u njoftua pas samitit të Këshillit Evropian të mbajtur më 18-19 qershor në Bruksel.
Sipas deklaratës së publikuar nga Këshilli Evropian, ky diskutim do të zhvillohet në kontekstin e vrullit të ri që ka marrë procesi i zgjerimit dhe duke iu referuar Deklaratës së Granadës.
Për Ballkanin Perëndimor, Këshilli Evropian përshëndeti zhvillimin e Samitit BE–Ballkani Perëndimor në Tivat të Malit të Zi më 5 qershor 2026, duke vlerësuar se ai ka kontribuar në nxitjen e mëtejshme të procesit të zgjerimit.
Këshilli Evropian ritheksoi se Bashkimi Evropian do të vazhdojë të bashkëpunojë ngushtë me vendet e Ballkanit Perëndimor dhe të mbështesë përpjekjet e tyre reformuese në rrugën drejt anëtarësimit në BE.
Në deklaratë theksohet gjithashtu se BE-ja mbetet e përkushtuar për të avancuar integrimin gradual mes Unionit dhe rajonit gjatë vetë procesit të zgjerimit, duke u bazuar në meritë dhe në një qasje të kthyeshme, në përputhje me progresin e secilit vend kandidat.
Lini një Përgjigje