FLASH
Shkruar nga Pamfleti
Një ngjarje e rëndë ka ndodhur sot në Nova Siri Scalo të Italisë, ku një 44-vjeçar shqiptar ka tentuar të vrasë me thikë bashkëshorten e tij pranë shkollës që frekuentojnë fëmijët e tyre adoleshentë.
Sipas dëshmive, burri e priti gruan në momentin kur ajo kishte shkuar të linte fëmijën në shkollë. Fillimisht mes tyre ka pasur një përplasje verbale, e cila më pas ka degjeneruar në dhunë fizike.
Hetimet paraprake tregojnë se 44-vjeçari e ka goditur gruan me thikë, ndërsa ajo është përpjekur të mbrohet me duar dhe krahë. Një nga goditjet i është afruar zonës së qafës, por plaga rezultoi e lehtë.
Viktima pësoi disa plagë në duar dhe krahë dhe u transportua nga shërbimi i urgjencës 118 në spitalin “Giovanni Paolo II” në Policoro. Pas trajtimit mjekësor, ajo u la të kthehej në shtëpi në gjendje të mirë shëndetësore.
Pas sulmit, i dyshuari u largua nga vendngjarja në përpjekje për t’i shpëtuar policisë. Megjithatë, karabinierët arritën ta ndalonin vetëm disa orë më vonë.
44-vjeçari, banues në Prato, dyshohet se kishte udhëtuar nga ky qytet për të takuar bashkëshorten. Pas marrjes në pyetje nga hetuesit, ai u dërgua në burg.
Nga dëshmia e viktimës dhe verifikimet paraprake, rezulton se sulmi mund të ketë ardhur si pasojë e konflikteve të mëparshme familjare. Autoritetet po punojnë për të rindërtuar plotësisht dinamikën dhe motivin e ngjarjes.
Sipas hetimeve, sulmi ndodhi në një moment kur në zonë nuk kishte nxënës apo fëmijë të tjerë, duke shmangur kështu pasoja edhe më të rënda.
Lini një Përgjigje