FLASH
Shkruar nga Pamfleti
Detaje të reja janë zbardhur nga plagosja me armë zjarri e ndodhur pas mesnate në Tiranë, ku mbeti i plagosur rëndë një 17-vjeçar. Sipas hetimeve paraprake, ngjarja ndodhi në banesën e 19-vjeçarit Rigers Sylaj, ku ai ndodhej bashkë me tre shokët e tij.
Burime nga hetimi bëjnë me dije se të rinjtë po konsumonin alkool, kur në një moment 19-vjeçari ka marrë një pistoletë për t’ua treguar shokëve. Dyshohet se ai ka menduar se arma nuk kishte fishek në fole, por gjatë manipulimit të saj e ka drejtuar drejt 17-vjeçarit dhe arma është shkrepur.
Plumbi e goditi të miturin në kokë, ndërsa ai u dërgua në Spitalin e Traumës, ku ndodhet në gjendje të rëndë.
Pas plagosjes, 19-vjeçari dhe dy shokët e tjerë, përkatësisht 20 dhe 22 vjeç, e kanë nxjerrë të plagosurin në oborrin e banesës dhe kanë kërkuar ndihmën e ambulancës. Fillimisht, ata deklaruan para hetuesve se kishin dëgjuar një të shtënë arme dhe se 17-vjeçari ishte plagosur jashtë banesës.
Megjithatë, gjatë marrjes së mëtejshme në pyetje, tre të rinjtë kanë pranuar se ngjarja kishte ndodhur brenda banesës, në momentin kur Rigers Sylaj po u tregonte armën.
Sipas burimeve, pistoleta që u përdor në ngjarje ishte në pronësi të 19-vjeçarit, i cili mësohet se është djali i një ushtaraku.
Në përfundim të veprimeve të para hetimore, Policia arrestoi Rigers Sylajn për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”.
Ndërkohë, dy të rinjtë e tjerë u vunë në pranga për veprën penale “Veprime që pengojnë zbulimin e së vërtetës”.
Lini një Përgjigje