FLASH
Shkruar nga Pamfleti
Presidenti amerikan tha se SHBA po i përgjigjet rrëzimit të një helikopteri Apache, ndërsa vetëm disa orë më herët e kishte minimizuar incidentin.
Presidenti i Shteteve të Bashkuara, Donald Trump, deklaroi se kundërpërgjigjja amerikane ndaj Iranit për rrëzimin e një helikopteri ushtarak Apache është “shumë e fortë dhe shumë e fuqishme”.
“Mendoj se është shumë e rëndësishme të përgjigjemi. Ata rrëzuan një helikopter dhe ne po përgjigjemi në këto momente”, tha Trump për gazetarin e ABC News, Jonathan Karl, ndërsa Komanda Qendrore Amerikane (CENTCOM) po njoftonte zyrtarisht nisjen e sulmeve kundër objektivave iraniane.
“Kjo është një përgjigje ndaj asaj që bënë. E bënë me helikopterin tonë mbrëmë dhe besoj se kundërpërgjigjja duhet të jetë shumë e fortë, shumë e fuqishme dhe pikërisht e tillë është”, shtoi ai.
Deklaratat e Trump vijnë vetëm pak orë pasi presidenti amerikan kishte minimizuar incidentin. Në një intervistë për Wall Street Journal të martën, ai kishte thënë se rrëzimi i helikopterit “nuk ishte ndonjë gjë e madhe”.
Më herët, në një postim në Truth Social, Trump konfirmoi se dy pilotët e Apache-t kishin shpëtuar pa lëndime.
“Megjithatë, Shtetet e Bashkuara duhet domosdoshmërisht t’i përgjigjen këtij sulmi”, shkroi ai.
Deklaratat e presidentit amerikan vijnë në një moment kur tensionet mes Uashingtonit dhe Teheranit janë përshkallëzuar ndjeshëm, pas sulmeve amerikane ndaj objektivave iraniane dhe njoftimit të Iranit për lëshimin e raketave dhe dronëve drejt objektivave amerikane në rajon.
Lini një Përgjigje