FLASH
Shkruar nga Pamfleti
Një automjet tip “Range Rover” është përfshirë nga flakët në orët e para të mëngjesit në qytetin e Pogradecit. Ngjarja ka ndodhur në lagjen nr. 1, rreth orës 03:50 ku mjeti i parkuar është djegur pothuajse plotësisht.
Sipas burimeve, automjeti rezulton të jetë në pronësi të Erion Maxharit, një person i njohur për policinë lokale për shkak të precedentëve të mëparshëm penalë. Ai është përmendur edhe më herët në raportime mediatike, gjithashtu edhe në një incident të ndodhur ditën e zgjedhjeve, ku u përfshi në një konflikt fizik me një komisioner.
Maxhari, së bashku me një tjetër person, u arrestua në shkurt të 2025 pasi dyshohet se kanë goditur me grushte për shkak të detyrës një punonjës policise.
Kujtojmë se, më herët, Maxhari ka ushtruar detyrën e punonjësit të policisë në doganën e Qafë-Thanës.
Grupi hetimor ka nisur këqyrjen e vendit të ngjarjes dhe ka sekuestruar pamjet e kamerave të sigurisë në zonë, me qëllim zbardhjen e plotë të rrethanave. Burime paraprake bëjnë me dije se ekzistojnë dyshime për zjarrvënie të qëllimshme, ndërsa shkaku i zjarrit nuk është konfirmuar ende.
"Më datë 26.02.2026, rreth orës 03:50, në lagjen nr.1, Pogradec, ka rënë zjarr në automjetin e shtetasit E. M., i cili ka qenë i parkuar.
Grupi hetimor po punon për sqarimin e rrethanave të ngjarjes dhe përcaktimin e shkakut të rënies së zjarrit", njoftoi policia.
Në vitin 2018, Erion Maxhari u arrestua së bashku me tre policë të tjerë, pasi akuzoheshin si ishin pjesë e një grupi për trafikun e klandestinëve nga Shqipëria në SHBA, Kanada dhe Angli.
Ata shpërdoruan detyrën duke mos kryer regjistrimin e shtetasve të kontrabanduar. Nga 51 persona të përfshirë në këtë grup, 39 prej tyre u arrestuan në Shqipëri, mes tyre edhe 4 policët.
Lini një Përgjigje