FLASH
Shkruar nga Pamfleti
Dhjetëra të plagosur dhe persona të bllokuar nën rrënoja pas sulmeve në Kiev, Dnipro dhe Harkiv
Sulmet ajrore ruse ndaj qendrave të mëdha urbane të Ukrainës, përfshirë Kievin, Dnipron dhe Harkivin, kanë vrarë të paktën 11 persona, kanë plagosur dhjetëra të tjerë dhe kanë lënë persona të bllokuar nën rrënoja.
Sipas Forcave Ajrore të Ukrainës, Rusia lëshoi 73 raketa dhe 656 dronë kundër Ukrainës. Objektivat kryesore përfshinin Kievin, qytetin qendror të Dnipros dhe qytetet lindore Poltava, Harkiv dhe Zaporizhzhia. Mbrojtja ajrore ukrainase deklaroi se shkatërroi ose neutralizoi 40 raketa dhe 602 dronë.
Forcat Ajrore thanë se 30 raketa balistike, tre raketa lundruese dhe 33 dronë goditën objektiva në të paktën 38 lokacione. Mbetjet e dronëve të rrëzuar ranë në 15 vende të tjera. Në Kiev, të paktën katër persona humbën jetën dhe 63 u plagosën, mes tyre tre fëmijë, njoftoi Shërbimi Shtetëror i Emergjencave të Ukrainës.
Në Dnipro, të paktën gjashtë persona u vranë dhe 36 u plagosën. Mes viktimave ishte edhe një punonjës i ekipeve të shpëtimit, i cili humbi jetën gjatë një sulmi të dytë, ndërsa ekipet e emergjencës kishin mbërritur në vendin e goditjes së parë.
Guvernatori rajonal, Oleksandr Hanzha, publikoi në rrjetet sociale fotografi që tregonin ndërtesa banimi të dëmtuara rëndë, automjete të djegura dhe një kënd lojërash për fëmijë të shkatërruar. Në Harkiv, të paktën 14 persona u plagosën, ndërsa banesa, garazhe dhe automjete pësuan dëmtime.
Kryetari i Bashkisë së Kievit, Vitali Klitschko, tha se një goditje e dyshuar me raketë ndaj një pallati 24-katësh shkaktoi shembjen e një pjese të ndërtesës dhe se dyshohet që persona të jenë ende të bllokuar nën rrënoja. Ai shtoi se edhe ndërtesa të tjera, përfshirë një pallat nëntëkatësh, u përfshinë nga flakët.
“Në distriktin Obolon, automjetet po digjen pasi janë goditur nga mbetjet e raketave. Ka gjithashtu zjarre në dy zona të hapura, përfshirë një pranë një kopshti fëmijësh”, tha Klitschko. Sipas dëshmitarëve, mijëra banorë të Kievit kërkuan strehim në stacionet e metrosë dhe në strehimore të tjera pas alarmit ajror që përfshiu pjesën më të madhe të vendit në orët e para të së martës.
Në distriktin Podilskyi, katet e sipërme të një pallati nëntëkatësh pësuan dëmtime të pjesshme, duke lënë persona të bllokuar nën rrënoja. Operacionet e shpëtimit vazhduan gjatë orëve të para të mëngjesit, ndërkohë që alarmi ajror mbeti në fuqi.
Olena Dniprovska, 65 vjeç, dhe bashkëshorti i saj, Yevhen, 64 vjeç, u plagosën në apartamentin e tyre në distriktin Podilskyi të Kievit gjatë sulmit. “Dola në korridor me telefonin në dorë dhe, para se të kuptoja çfarë kishte ndodhur, gjithçka më ra mbi kokë, xhamat dhe dera u shkëput nga shpërthimi”, tha Dniprovska për Associated Press, me gjurmë gjaku të tharë në fytyrë dhe një fashë të mbështjellë rreth mjekrës.
“Vrapova drejt derës së hyrjes dhe fillova të thërrisja bashkëshortin tim nga dhoma, por edhe ai ishte hedhur nga vala e shpërthimit”, tha ajo, duke shtuar “tani nuk kam më ku të jetoj. Apartamenti është shkatërruar plotësisht, nuk ka dyer, nuk ka dritare, nuk ka ballkon. Mund të dalësh drejtpërdrejt nga dhoma në rrugë.”
Kompania energjetike DTEK njoftoi për Reuters se furnizimi me energji elektrike u ndërpre për 140 mijë banorë të kryeqytetit. Më vonë, kompania tha se ekipet e saj rikthyen energjinë për 110 mijë banorë, ndërsa dy inxhinierë të saj u plagosën.
Të hënën, presidenti ukrainas Volodymyr Zelensky përsëriti paralajmërimet për një sulm të mundshëm në shkallë të gjerë dhe u bëri thirrje qytetarëve t’u kushtojnë vëmendje të veçantë sinjaleve të alarmit ajror.
“Paralajmërimet e inteligjencës për sulme ruse mbeten në fuqi. Një sulm masiv është i mundur; ata kanë bërë përgatitjet për të”, tha Zelensky në adresimin e tij të përnatshëm me video. Sipas tij, “mbrojtësit tanë janë të gatshëm 24 orë në ditë, në masën më të madhe të mundshme me furnizimet që kemi aktualisht.”
Javën e kaluar, Rusia deklaroi se synonte të kryente “sulme sistematike” ndaj objektivave në Kiev që lidhen me ushtrinë ukrainase, si dhe ndaj qendrave vendimmarrëse, duke u bërë thirrje të huajve të largohen nga qyteti.
Deklarata erdhi pas një sulmi me dron ndaj një konvikti në rajonin e Luhanskut, nën kontrollin rus në Ukrainë, ku humbën jetën 21 persona. Ukraina mohoi se kishte kryer atë sulm.
Lini një Përgjigje