FLASH
Shkruar nga Pamfleti
Pavarësisht sfidave të mëdha që përballon Haiti, trajneri i kombëtares Sebastien Migne beson se pjesëmarrja në Kupën e Botës mund të shërbejë si një burim shprese dhe krenarie për gjithë vendin.
Haiti është shortuar në një grup të vështirë me Skocinë, Brazilin dhe Marokun, por tekniku francez zgjedh ta shohë këtë si një mundësi.
“Sigurisht që është një grup i fortë. Por, nëse e shohim nga ana pozitive, do të jemi në qendër të vëmendjes dhe ky është një shpërblim i madh për djemtë”, tha Migne.
Përfaqësimi në skenën më të madhe të futbollit botëror konsiderohet një arritje e rëndësishme jo vetëm për lojtarët, por edhe për popullin haitian, i cili e jeton futbollin me pasion.
Mesfushori Zhan-Rikner Belegarde kujton atmosferën që krijoi kualifikimi historik i ekipit.
“Kur u kualifikuam, vendi ishte i lumtur për një ose dy ditë. Ndoshta mund ta bëjmë sërish këtë”, u shpreh ai.
Megjithatë, realiteti i Haitit mbetet i vështirë. Belegarde dhe trajneri Migne kanë një të përbashkët të pazakontë: asnjëri prej tyre nuk e ka vizituar ndonjëherë vendin që përfaqësojnë.
“Është e pamundur sepse është shumë e rrezikshme”, tha Migne.
Sipas tij, zakonisht banon në vendet ku punon, por kjo nuk është e mundur në rastin e Haitit. Fluturimet ndërkombëtare drejt vendit janë ndërprerë, ndërsa stadiumi kombëtar në Port-au-Prince mbetet i mbyllur që prej shkurtit 2024.
Zona përreth stadiumit, ashtu si pjesa më e madhe e kryeqytetit, kontrollohet nga banda kriminale. Dhuna, korrupsioni, uria dhe paqëndrueshmëria politike kanë rënduar jetën e rreth 12 milionë banorëve të vendit.
Megjithatë, futbolli vazhdon të mbetet një burim shprese, veçanërisht për të rinjtë.
“Sidomos për të rinjtë që rriten në Haiti në këto rrethana, futbolli u jep besim”, tha Belegarde.
Për shkak të situatës së sigurisë, Haiti i ka zhvilluar ndeshjet kualifikuese si vendas në Kurasao, shpesh përpara vetëm disa qindra tifozëve. Një situatë e ngjashme pritet edhe në Kupën e Botës, pasi shumë haitianë nuk mund të udhëtojnë drejt Shteteve të Bashkuara për shkak të kufizimeve të vizave dhe kostove të larta të udhëtimit.
Kështu, pjesa më e madhe e tifozëve do ta ndjekë nga ekranet televizive paraqitjen e dytë historike të Haitit në një Kupë Bote, pas debutimit në vitin 1974.
Mes emrave kryesorë të skuadrës spikasin mbrojtësi Xhoi Plaçide dhe sulmuesi Dakens Nazon, i cili ka realizuar 44 gola në 78 ndeshje me kombëtaren. Në ekip bën pjesë edhe portieri Xhoshue Duverger, që aktivizohet me klubin gjerman Kozmos Koblenz.
Nën drejtimin e Migne, kombëtarja haitiane ka fituar më shumë disiplinë, unitet dhe vetëbesim, duke regjistruar mesatarisht 1.83 pikë për ndeshje në 24 takime.
Megjithatë, trajneri 53-vjeçar mbetet realist për objektivat e skuadrës.
“Në një ndeshje të vetme mund të ndodhë gjithçka. Ne duam të shkruajmë një kapitull të ri në histori me këta lojtarë”, deklaroi ai.
Historia e Haitit në Kupën e Botës nuk ka qenë e lehtë. Në pjesëmarrjen e vetme të mëparshme, në vitin 1974 në Gjermaninë Perëndimore, skuadra humbi të tre ndeshjet ndaj Italisë, Polonisë dhe Argjentinës, me golaverazh 2-14.
Megjithatë, Emanuel Sanon mbetet një figurë legjendare e futbollit haitian. Me 100 ndeshje dhe 47 gola, ai mban ende rekordin e kombëtares, ndërsa Dakens Nazon ndodhet vetëm tre gola larg këtij suksesi.
Vetë Nazon ka kaluar momente dramatike në rrugëtimin drejt Kupës së Botës. Sulmuesi i Esteghlal ndodhej në Iran kur nisën sulmet ajrore amerikano-izraelite.
“Në avion na thanë të zbrisnim sepse lufta sapo kishte filluar”, kujton ai.
Sipas futbollistit, një raketë goditi vetëm rreth 100 metra larg vendit ku ndodhej. Më pas ai u largua me makinë dhe arriti të dalë nga Irani përmes Azerbajxhanit pas një udhëtimi që zgjati rreth 20 orë.
Pavarësisht gjithçkaje, Nazon thotë se kombëtarja haitiane do të paraqitet pa komplekse në Kupën e Botës.
“Nuk kemi frikë nga askush. Jemi modestë, por krenarë sepse jemi haitianë”, tha ai.
Sulmuesi ka edhe një objektiv personal për turneun më të rëndësishëm të futbollit botëror.
“Dua të shënoj një gol në Kupën e Botës. Nuk ka rëndësi kundër kujt”, përfundoi Nazon.
Lini një Përgjigje