FLASH
Shkruar nga Pamfleti
Kreu i Grupit Parlamentar të Partisë Demokratike, Gazment Bardhi, ka akuzuar mazhorancën se po ndërmerr veprime për të kufizuar rolin e opozitës në Kuvend.
Gjatë fjalës së tij në mbledhjen e grupit parlamentar të PD-së, Bardhi deklaroi se shumica qeverisëse ka refuzuar çdo nismë të opozitës, përfshirë kërkesat për interpelanca dhe ngritjen e Komisioneve Hetimore.
Ai theksoi gjithashtu se opozita ka informuar për këtë situatë si kryetarin e Kuvendit, ashtu edhe përfaqësitë diplomatike, ndërsa akuzoi mazhorancën për standarde të dyfishta ndaj deputetëve.
“Mazhoranca refuzon çdo iniciativë të opozitës, refuzon çdo kërkesë për Interpelancë dhe Komisione Hetimore. I dërguan raport kreut të Kuvendit por edhe Ambasadave. Mazhoranca anë Kuvend ka refuzuar ngritjen e 5 Komisioneve Hetimore, 7 kërkesa për interpelancë me kryeministrin”, tha Bardhi, duke shtuar se, ‘kanë urrejtje për deputetët e opozitës dhe amnisti për deputetët e mazhorancës’.
Sipas tij, mazhoranca ka ndërmarrë një “sulm të hapur” ndaj opozitës, duke përmendur edhe përjashtimin e 15 deputetëve brenda një periudhe prej gjashtë muajsh.
Lini një Përgjigje