FLASH
Shkruar nga Pamfleti
Një prezantuese televizive në Argjentinë ka dhënë dorëheqjen pasi raportoi gabimisht se Horge Mesi, babai i futbollistit Lionel Mesi, kishte ndërruar jetë. Incidenti shkaktoi reagime të shumta në media dhe zemërim nga familja e yllit argjentinas.
Gjatë një transmetimi të drejtpërdrejtë në “Luzu TV”, Florencia Penja deklaroi se Horge Mesi kishte vdekur. Në të njëjtën kohë, Lionel Mesi ishte i angazhuar me kombëtaren e Argjentinës në Kupën e Botës, ku realizoi një tripletë në ndeshjen ndaj Algjerisë.
Megjithatë, pak më vonë u konfirmua se lajmi ishte i pavërtetë. Në një reagim zyrtar, familja Mesi sqaroi se Horge Mesi ndodhet nën kujdes mjekësor dhe se gjendja e tij shëndetësore po përmirësohet.
Familja kërkoi respektimin e privatësisë në këtë periudhë dhe theksoi se çdo informacion që nuk publikohet drejtpërdrejt prej saj nuk duhet të konsiderohet i besueshëm. Gjithashtu, u bëri thirrje mediave të tregojnë përgjegjësi dhe kujdes në trajtimin e informacioneve të tilla.
Pas valës së kritikave, Florencia Penja kërkoi falje publike, duke deklaruar se ishte vënë në lajthitje nga informacioni që i ishte përcjellë në kufje gjatë transmetimit. Ajo pranoi përgjegjësinë për gabimin dhe njoftoi largimin e saj nga “Luzu TV”.
Nga ana tjetër, edhe drejtuesit e “Luzu TV” e cilësuan incidentin si të papranueshëm, duke konfirmuar ndërprerjen e bashkëpunimit me personat e përfshirë në përhapjen e informacionit të pasaktë.
Lini një Përgjigje