FLASH
Shkruar nga Pamfleti
Kryeministri Edi Rama deklaroi se askush që ka kryer shkelje nuk duhet të mbetet i pandëshkuar, por ngriti dyshime për mënyrën si po aplikohen masat e sigurisë dhe paraburgimet në disa raste.
Ai solli si shembull drejtuesin e KESH, i cili ndodhet prej kohësh në arrest shtëpie, dhe pyeti se çfarë ndodh nëse ai rezulton i pafajshëm. Rama theksoi se e njëjta pyetje vlen edhe për dhjetëra persona që ndodhen në burg pa përfunduar gjykimi.
Sipas tij, nëse një pjesë e të arrestuarve dalin të pafajshëm, atëherë dëmi për ta dhe për shtetin mbetet i pakthyeshëm. Ai tha se disa prej tyre kanë përjetuar pasoja psikologjike dhe profesionale, duke shtuar se ka punonjës që kanë braktisur administratën ose refuzojnë të firmosin dokumente nga frika e ndjekjes penale.
Rama deklaroi se institucionet e drejtësisë duhet të reflektojnë mbi ndikimin e vendimeve të tyre, ndërsa pushteti legjislativ dhe ai ekzekutiv duhet të kontribuojnë për rritjen e ndërgjegjësimit mbi pasojat që mund të sjellë përdorimi i pakontrolluar i kompetencave.
Në këtë kontekst, Rama përmendi edhe punën e një grupi ekspertësh vendas dhe të huaj, që po shqyrton çështje të sistemit të drejtësisë. Sipas tij, një eksperte franceze ka vënë në dukje se qasja duhet të nisë nga liria që garanton drejtësia dhe jo nga drejtësia që heq lirinë.
"Cilido që realizuar qëllime të fshehura, nuk është padiksutim i pandëshkueshëm. Po sikur menaxheri i KESH, prej kohësh në arrest shtëpie, por sikur të jetë i pafajshëm, kush fitoi dhe kush humbi në këtë mes. Po sikur të jenë të vërtetë, për 58 njerëz që sot janë nëpër burgje dhe nuk iu është bërë gjyqi. Çfarë ndodh me ata? Po ka plot e plot të pafajshëm që kanë ngelur me trauma. E di ku janë një pjesë e madhe e tyre?! E kanë lënë punën në shtet, nuk firmosin asnjë copë letër, nga frika. Disa kurohen nga psikologët. Çfarë ka fituar këtu drejtësia, shteti?! Që për hir të së vërtetës kemi burime njerëzore të kufizuara. Këto pyetje duhet t’ua bëjnë vetes njerëzit e drejtësisë. Pushteti legjislativ dhe ekzekutiv duhet t’i bëjë më te vetëdijshëm për dëmet që mund të shkaktojë, fuqia e tyre nga egoja. Janë për t’u frenuar sa më shumë. Fuqia e tyre e pakontrolluar, nga prindi, vëllai, motra, qytetari brenda tyre. Jo për të mbyllur sytë para provave dhe fajin, por për të hapur sytë 4 që faji të mos jetë fati i paracaktuar nga egoja e tyre. Kur grupi ynë i punës që po punon me ekspertë të drejtësisë së Italisë dhe të Francë, ekspertja e palës franceze tha “Nuk niseni nga liria që mundëson drejtësinë, por nga drejtësia që heq lirinë”, tha Rama.
Lini një Përgjigje