FLASH
Shkruar nga Pamfleti
Një autobus i një agjencie turistike ka dalë nga rruga dhe ka përfunduar në një kanal anësor në zonën e Ishull-Shëngjinit, gjatë mesditës së kësaj të shtune.
Sipas informacioneve paraprake, autobusi po kthehej nga Shëngjini dhe në momentin e aksidentit nuk kishte pasagjerë në bord, por vetëm anëtarë të stafit të agjencisë turistike.
Mësohet se drejtuesi i mjetit kishte zgjedhur të lëvizte në një rrugë dytësore për të shmangur trafikun e rënduar në dalje të zonës turistike. Gjatë udhëtimit, në një segment të ngushtë rruge, përballë autobusit është shfaqur një automjet tjetër.
Për të shmangur përplasjen, shoferi ka devijuar drejt skajit të rrugës, por për shkak të terrenit dhe mungesës së hapësirës, autobusi ka rrëshqitur dhe ka përfunduar në kanalin anësor.
Personat që ndodheshin në mjet kanë dalë menjëherë jashtë dhe nuk kanë pësuar lëndime. Nga aksidenti janë regjistruar vetëm dëme materiale në autobus.
Në vendngjarje kanë mbërritur shërbimet e policisë rrugore, të cilat po punojnë për dokumentimin e plotë të ngjarjes dhe sqarimin e rrethanave që çuan në daljen e autobusit nga rruga.
Lini një Përgjigje