FLASH
Shkruar nga Pamfleti
Ardian Çapja, i konsideruar nga SPAK si kreu i një grupi kriminal që urdhëronte vrasje për hakmarrje, është marrë në pyetje nga hetuesit belgë, brenda qelive të burgut të Burrelit, ku është trasferuar dhe vuan dënimin me burgim të përjetshëm.
Burime për VNA thanë se belgët e pyetën Çapjan për disa personazhe të njohur të botës së krimit në vend, si dhe për marrëdhëniet që kishte me Bledar Muçën, i cili u ekzekutua në Belgjikë. Dëshmia e Ardian Çapjas mbahet top sekret, por mendohet se mund t'i shërbejë hetimeve që autoritetet belgë po kryejnë rreth eksponentëve shqiptarë të krimit.
Një prej këtyre eksponentëve ishte dhe Bledar Muça, njeri i besuar i Ardian Çapjas, i cili u qëllua për vdekje ne Belgjikë.
Muça iu kishte shpëtuar dy atentateve në Shqipëri, ndërsa ishte i dyshuari kryesor për vrasjen e ish-oficerit të policisë, Roland Rexhepi i njohur si Doda dhe vëllait të tij, Ilir Rexhepi, por asnjëherë nuk u dënua për këto krime.
Ndërkohë, Ardian Çapja, bashkë me nipin e tij, Florenc Çapja që ndodhet në Dubai, janë dënuar si urdhërues dhe financues të vrasjes së Nezir e Gentian Beqirit, babë e bir në vitin 2012 në shtëpinë e tyre në Elbasan.
Gentian Beqirin e akuzonte si pjesëmarrës në vrasjen e vëllait të tij, Sokol Çapja. Kundër Ardian e Florenc Çapjas u rrëfye i penduari Ervis Bardhi, por të pandehurit e kanë kundërshtuar dëshminë e tij duke e konsideruar si të pabesueshëm dëshmitarin.
Ardian Çapjas i ekzekutuan edhe avokatin e tij, Ravik Gurrën në një lokal në zemër të Elbasanit.
Lini një Përgjigje