FLASH
Shkruar nga Pamfleti
Banorët e qytetit historik anglez shprehin shqetësim për aktivitetin e bandave të drogës, bastisjet policore dhe fenomenin e “cuckooing”, ndërsa statistikat e fundit e rendisin Bodmin si zonën më të rrezikshme në qark...
Qytetarë të shumtë mblidhen përgjatë rrugës kryesore në qytetin historik anglez Bodmin për të parë një paradë fëmijësh që marshojnë me pankarta në festën e Saint Piran’s Day, ditës kombëtare të Cornwall-it që shënohet çdo 5 mars. Pamje të ngjashme shihen edhe në shumë qytete të tjera të këtij qarku në jugperëndim të Anglisë.
Megjithatë, sipas gazetës britanike The Sun, pas pamjeje festive fshihet një problem serioz kriminaliteti që është rrënjosur në komunitet. Bodmin është cilësuar si qyteti më i rrezikshëm në Cornwall kur merret parasysh ashpërsia e krimeve të raportuara.
Banorët thonë se jetojnë me frikë nga aktiviteti i rrjeteve të trafikut të drogës, të njohura si “county lines”, të cilat shfrytëzojnë personat më të pambrojtur. Këto grupe përdorin edhe fenomenin e quajtur “cuckooing”, ku kriminelët marrin nën kontroll banesat e njerëzve vulnerabël për t’i përdorur si depo për drogë, para dhe pajisje të lidhura me trafikun, si dhe si baza për shpërndarjen e substancave narkotike.
Bodmin njihet për atraksionin turistik Bodmin Jail, një burg historik me të kaluar të errët. Megjithatë, banorët thonë se sot mbi qytet rëndon një kërcënim i ri që lidhet me aktivitetin e drogës.
Heather Dunn, 70 vjeçe, e cila punon në fushën e estetikës dhe jeton në zonë prej 40 vitesh, tha për The Sun se situata ka ndryshuar ndjeshëm.
“Kur u zhvendosa këtu 40 vite më parë, Bodmin ishte një qytet i mrekullueshëm ku të gjithë njihnin njëri-tjetrin. Ishte shumë i qetë dhe shumë i sigurt. Tani, si shumë qytete të tjera, është bërë një vend ku duhet të shqetësohemi për drogën”, tha ajo.
Sipas saj, në ndërtesën ku jeton kishte banuar një trafikant i njohur droge dhe shpesh në shkurret pranë banesës gjendeshin shiringa të përdorura dhe pajisje të tjera të lidhura me drogën.
Dunn mendon se një nga arsyet e përhapjes së problemit është rritja e qytetit dhe ardhja e banorëve nga zona të tjera të vendit, përfshirë persona që sistemohen në banesa sociale.
“Unë nuk do të dilja natën. Ka shumë njerëz që qëndrojnë jashtë duke bërë gjëra që nuk dihen”, tha ajo.
Problemi, sipas banorëve, nuk kufizohet vetëm gjatë natës. Sandra Vigus, 81 vjeçe, e cila po shëtiste qenin e saj në një park lokal, shprehu shqetësim për të rinjtë.
“Kur isha e re nuk kisha dëgjuar kurrë për drogë. Sot është bërë një pjesë e frikshme e botës ku jetojmë dhe është shqetësuese të dëgjosh çfarë ka zbuluar policia në Bodmin kohët e fundit”, tha ajo.
Edhe David Hodges, 66 vjeç, tha se problemi i drogës në qytet është i përhapur. “Javën e kaluar policia bastisi një banesë dhe gjeti drogë, por ka shumë të tjera. Të rinjtë mblidhen në parkingje natën duke pirë kanabis dhe era është shumë e fortë”, u shpreh ai.
Një banore tjetër, që kërkoi të mbetet anonime, tha se qyteti është “i mbushur me drogë të çdo lloji” dhe se bastisjet policore janë të nevojshme për të frenuar situatën.
Vetëm disa javë më parë, policia bastisi një apartament në katin përdhes ku konfiskoi armë, para dhe një sasi të konsiderueshme droge, përfshirë kokainë, MDMA, diazepam dhe kanabis, si dhe pajisje të përdorura për konsumimin e tyre.
Një burrë 38-vjeçar u arrestua nën dyshimin për posedim të drogës së klasës A dhe B, si dhe për posedim me qëllim shpërndarjen e drogës së klasës C. Ai u lirua me kusht ndërsa hetimet vazhdojnë.
Në janar, policia mbylli dy banesa ku jetonin persona të vulnerabël që ishin viktima të fenomenit “cuckooing”. Autoritetet sqarojnë se ky fenomen ndodh kur kriminelët, zakonisht trafikantë droge, marrin nën kontroll shtëpinë e një personi të pambrojtur dhe e përdorin për aktivitete kriminale, duke e lënë banorin të frikësuar dhe të izoluar.
Policia ka kërkuar më parë që banorët të ndihmojnë me informacion për të identifikuar raste të tjera, duke theksuar se “cuckooing ndodh në Bodmin”.
Një banesë tjetër e tillë u bastis dhe u mbyll në shtator të vitit të kaluar, ndërsa dy raste të tjera u identifikuan në vitin 2024, ndërsa bandat e trafikut të drogës vazhdojnë të synojnë zona më rurale.
Pas një urdhri mbylljeje, për tre muaj në këto banesa lejohen të hyjnë vetëm qiramarrësi, policia, punonjës socialë ose profesionistë të shëndetësisë.
Një nga operacionet më të mëdha policore në Bodmin ndodhi në vitin 2023, kur u zbulua një fabrikë e madhe kanabisi me disa dhoma, ku rriteshin rreth 4,000 bimë, me një vlerë të vlerësuar në treg prej 2 milionë paundësh.
Në vendngjarje u gjetën katër shtetas shqiptarë që po kujdeseshin për kultivimin e bimëve. Ata morën dënime me dy vite burg me kusht, ndërsa prisnin procedurat e emigracionit.
Inspektori i policisë Adam Stonehill, i cili drejton ekipin e policisë së lagjes në Bodmin, tha se droga shkakton dëme të mëdha në komunitet dhe lidhet me shumë forma të tjera kriminaliteti.
Ai theksoi se konfiskimi i drogës dhe armëve nga rrugët përbën një ndërprerje të rëndësishme të aktivitetit kriminal.
Statistikat tregojnë se kriminaliteti në Bodmin u rrit me 7 për qind në vitin 2025, me 968 krime të raportuara, krahasuar me 906 në vitin 2024. Kjo përkthehet në 87 krime për çdo 1,000 banorë, rreth 54 për qind më shumë se mesatarja e Cornwall-it, që është 57 për 1,000 banorë.
Sipas të dhënave të krimit për vitin 2026, niveli i kriminalitetit në Bodmin është 40 për qind më i lartë se mesatarja e rajonit jugperëndimor dhe 17 për qind më i lartë se mesatarja në Angli, Uells dhe Irlandën e Veriut.
Renditja e rrezikshmërisë e vendos Bodmin në vendin e parë në Cornwall për sa i përket ashpërsisë së krimeve, i ndjekur nga qytetet Liskeard dhe Newquay.
Krimet më të shpeshta të raportuara janë dhuna dhe veprat penale seksuale, një prirje e ngjashme me shumë zona të tjera në Mbretërinë e Bashkuar.
Këshilli i Cornwall-it nuk komentoi mbi çështjen, duke theksuar se është kompetencë e policisë.
Shefi i inspektorëve të policisë së Devon dhe Cornwall, Matt Setchell, tha se autoritetet janë të angazhuara për të luftuar krimin e drogës dhe për të mbrojtur komunitetin.
Ai theksoi se policia vazhdon të kryejë operacione të planifikuara, përfshirë bastisje, urdhra mbylljeje dhe hetime për të sjellë autorët para drejtësisë.
Setchell gjithashtu u bëri thirrje banorëve të raportojnë çdo informacion për trafikun e dyshuar të drogës në Bodmin, duke theksuar se bashkëpunimi i komunitetit është thelbësor për të parandaluar krimin dhe për të mbrojtur personat vulnerabël nga shfrytëzimi. /Pamfleti/
Lini një Përgjigje