FLASH
Shkruar nga Pamfleti
Agjencia e Mbikëqyrjes Policore (AMP) ka nisur hetime për të verifikuar veprimet dhe mosveprimet e efektivëve të policisë në Durrës, pas denoncimeve të banorëve të lagjes nr. 15, në zonën e ish-Kënetës.
Sipas pretendimeve të qytetarëve, strukturat policore nuk kanë reaguar në kohë ndaj sinjalizimeve të përsëritura për qarkullimin e automjeteve me shpejtësi të lartë në këtë zonë, duke ngritur shqetësime për sigurinë rrugore.
Hetimi vjen në vijim të aksidentit tragjik të ndodhur mesditën e së dielës, ku humbën jetën dy të mitur dhe një tjetër mbeti i plagosur rëndë, pasi u përplas nga një automjet i drejtuar nga 57-vjeçari Nikoll Radaçi, i dyshuar se ishte në gjendje të dehur.
Ngjarja ka shtuar dyshimet mbi reagimin e institucioneve dhe nëse janë marrë masat e duhura për parandalimin e rrezikut, pavarësisht ankesave të mëparshme të banorëve.
AMP pritet të verifikojë nëse ka pasur shkelje të detyrës nga ana e punonjësve të policisë dhe nëse janë ndjekur procedurat për trajtimin e denoncimeve, ndërsa nuk përjashtohet mundësia e përgjegjësive ligjore për personat përgjegjës.
Ndërkohë, një ditë pas ngjarjes, drejtori i Policisë së Durrësit, Skënder Hita, ka vendosur pezullimin nga detyra të zinxhirit komandues të policisë vendore, deri në përfundim të hetimeve.
Lini një Përgjigje