FLASH
Shkruar nga Pamfleti
Edgar Morin, një nga intelektualët më të njohur francezë dhe figurë e rëndësishme e mendimit bashkëkohor, është ndarë nga jeta në moshën 104-vjeçare.
Lajmi u konfirmua nga bashkëshortja e tij, Sabah Abouessalam Morin, e cila vlerësoi kontributin e jashtëzakonshëm të filozofit dhe studiuesit francez, duke theksuar se ai mbeti aktiv dhe i përkushtuar ndaj çështjeve globale deri në ditët e fundit të jetës.
“Ai deri në ditët e fundit qëndroi i lidhur me botën dhe me njerëzit. Boshllëku që lë pas është i madh, por mendimi dhe guximi i tij do të vazhdojnë të na udhëheqin”, u shpreh ajo.
I lindur në Paris në vitin 1921, në një familje hebreje me origjinë greke, Morin ndërtoi një karrierë të gjatë akademike dhe intelektuale. Edhe pse fillimisht u formua si sociolog, ai zgjeroi vazhdimisht fushën e kërkimeve të tij, duke bashkuar filozofinë, antropologjinë, psikologjinë dhe biologjinë në analizën e natyrës njerëzore.
Vetë Morin preferonte të quhej “humanolog”, një term që pasqyronte qasjen e tij ndërdisiplinore ndaj dijes dhe shoqërisë.
Përveç veprimtarisë akademike, ai la gjurmë edhe në historinë e kinematografisë dokumentare. Filmi “Chronique d’un été”, i realizuar në vitin 1961 së bashku me Jean Rouch, konsiderohet një vepër themelore e stilit të njohur si “cinéma vérité”.
Gjatë dekadave, Morin u shqua si një zë kritik dhe i pavarur në debatin publik, duke trajtuar tema si globalizimi, kriza klimatike, nacionalizmi, pandemitë dhe sfidat e shoqërive moderne.
Për shumë studiues dhe akademikë, Edgar Morin mbetet një nga mendimtarët më me ndikim të Europës moderne, ndërsa veprat dhe idetë e tij vazhdojnë të shërbejnë si referencë për breza të tërë kërkuesish dhe intelektualësh.
Lini një Përgjigje