FLASH
Shkruar nga Pamfleti
Shqipëria e ka mbyllur në disavantazhin 0-1 pjesën e parë të ndeshjes miqësore ndaj Luksemburgut, e zhvilluar në stadiumin “Air Albania”.
Kuqezinjtë e nisën takimin me një rast të mirë në minutën e katërt, kur Laçi provoi me një goditje nga kufijtë e zonës, por topi përfundoi jashtë, ngjitur me shtyllën.
Vetëm tre minuta më vonë, Bajrami depërtoi nga krahu i djathtë dhe pasoi në shtyllën e parë për Laçin, i cili nuk arriti ta devijonte sferën drejt rrjetës.
Në minutën e tetë erdhi goditja për skuadrën shqiptare. Dardari kaloi me lehtësi Pllanën në krah dhe më pas shërbeu në qendër për Sinanin, i cili nuk gaboi përballë portës, duke kaluar Luksemburgun në avantazh 0-1.
Pas golit të pësuar, Shqipëria u përpoq të reagonte dhe në minutën e 19-të Kristjan Asllani provoi me një goditje të fortë nga distanca, por portieri i miqve ishte i vëmendshëm dhe kontrolloi pa vështirësi.
Në përfundim të 45 minutave të para, Luksemburgu kryeson me rezultatin minimal 0-1, ndërsa kuqezinjtë do të kërkojnë reagimin në pjesën e dytë për të shmangur humbjen në këtë test të dytë miqësor, pas disfatës së pësuar pak ditë më parë kundër Izraelit po në “Air Albania”.
Lini një Përgjigje