FLASH
Shkruar nga Pamfleti
Interi ka arritur të marrë një fitore të rëndësishme në shtëpi, duke mundur me rezultatin 3-1 Lacion. Pavarësisht se në pjesën e parë zikaltërit e panë veten në disavantazh, në të dytën arritën të reagonin mirë duke shënuar 3 gola.
Por më shumë festë ka pasur në stadiumin “Maradona” dhe në qytetin e Napolit, që me një fitore të mundshme ndaj Salernitanës (në orën 15:00), të kaltërit shpallen matematikisht kampionë.
Sfida në Milano u zhbllokua në minutën e 27. Ishin zikaltërit që goditën të parët, duke shënuar me Mkitarjan, por goli u anulua për pozicion jashtë loje nga VAR.
Tri minuta më pas erdhi befasia për vendasit. Skuadra e Sarrit gjeti golin e avantazhit me Felipe Anderson, i cili përfitoi nga një gafë e Açerbit në mbrojtje.
Miqtë shkuan në avantazh të një goli në pushimin e ndeshjes, ndërsa në të dytën Interi sulmoi pa rreshtur. Goli i barazimit erdhi në minutën e 78. Lautaro Martinez, pasi mori një top në qendër të zonës nga Lukaku, nuk fali përballë portierit.
Pesë minuta më vonë, Lukaku dha një tjetër asist, kësaj here për Gosens, i cili përmbysi shifrat në 2-1. Interi jo vetëm mbrojti avantazhin, por shënoi edhe të tretin në minutën e 90. Dopietë personale e argjentinasit Lautaro.
Me këtë fitore, Interi e sheh veten në vendin e katërt, me pikë të barabarta Milanin e Romën.
Lini një Përgjigje