FLASH
Shkruar nga Pamfleti
SHBA-ja e nisi me fitore bindëse aventurën në Botërorin 2026, ku është një nga vendet organizatore, duke mposhtur Paraguain me rezultatin 4-1. Protagonisti absolut i sfidës ishte Folarin Balogun, autor i dy golave në pjesën e parë, që vendosën bazat e suksesit amerikan.
Sulmuesi i Monakos ka një histori të veçantë që lidhet drejtpërdrejt me përfaqësimin e Shteteve të Bashkuara. Megjithëse u rrit në Angli dhe zhvilloi karrierën e tij futbollistike në akademinë e Arsenalit, Balogun përfundoi duke veshur fanellën amerikane falë një rrethane të pazakontë.
I lindur nga prindër nigerianë me banim në Londër dhe me shtetësi britanike, Balogun erdhi në jetë në SHBA në vitin 2001. Prindërit e tij ndodheshin për pushime në Shtetet e Bashkuara kur nëna e tij ishte në muajt e fundit të shtatzënisë. Sipas rrëfimeve të publikuara më herët, familja kishte planifikuar të kthehej në Angli, por kompanitë e udhëtimit nuk lejuan fluturimin për shkak të afërsisë së datës së lindjes dhe rreziqeve që mund të sillte një udhëtim i gjatë.
Si pasojë, familja qëndroi në SHBA deri në lindjen e Folarin Balogun, i cili përfitoi automatikisht shtetësinë amerikane sipas legjislacionit të vendit. Më pas, familja u rikthye në Londër, ku futbollisti u rrit dhe hodhi hapat e parë në futbollin profesionist.
Balogun përfaqësoi Anglinë në të gjitha kategoritë e moshave deri te skuadra U-21. Në vitin 2022 ai u përball dy herë me Shqipërinë U-21, duke realizuar katër gola në dy ndeshje ndaj kuqezinjve.
Megjithatë, në vitin 2023, sulmuesi vendosi të ndryshonte përfaqësuesen dhe të pranonte ftesën e SHBA-së, pa pritur mundësinë për t’u bërë pjesë e ekipit të parë të Anglisë. Një zgjedhje që rezultoi e suksesshme, pasi sot ai konsiderohet një nga lojtarët kyç të kombëtares amerikane.
Dy golat ndaj Paraguait në ndeshjen hapëse të Botërorit 2026 konfirmuan edhe një herë rëndësinë e Balogun në projektin e SHBA-së, që synon të lërë gjurmë në turneun më të madh të futbollit botëror.
Lini një Përgjigje