FLASH
Shkruar nga Pamfleti
Ndeshja e javës së tetë në Kategorinë e Dytë ndërmjet Tërbunit dhe Besëlidhjes nuk u zhvillua e plotë.
Vetëm 45 minutat e para u luajtën, pasi më tej ishte e pamundur që të luhej në terrenin e mbuluar nga bora në stadiumin ”Ismail Xhemali” të Pukës. Pas minutës së 35 u bë tepër e vështirë për gjyqtarët për të dalluar vijat kufizuese të fushës.
Pas mbarimit të pjesës së parë, gjyqtarët e ndeshjes bashkë me delegatin vërejtën sërish terrenin, por ishte e pa mundur për të zhvilluar pjesën e dytë. Në momentin që u mor vendimi për ndeshjen mes Tërbunit dhe Besëlidhjes, trashësia e borës në fushën e lojës e kishte kaluar trashësinë 10 cm .
Pjesa e dytë e ndeshjes është vendosur që të luhet ditën e mërkurë, ora 13:00 dhe do të luhet në qytetin e Shkodrës, me shumë mundësi në kompleksin “Reshit Rusi”.
Gjatë pjesës së parë të ndeshjes ndodhi edhe një incident, ku gjendja e portierit Shkoza fillimisht solli panik te të pranishmit në fushë dhe stadium. Për shkak të temperaturave të ulëta portieri pati probleme dhe u shoqërua me autoambulancë në spitalin e Pukës.
Pasi ndihmës mjekësore që mori në spital, portieri Entoni Shkoza u bë më mirë duke e kaluar panikun fillestar. Mësohet se gjendja e portierit ka qenë e stabilizuar pas ndihmës mjekësore dhe tashmë çdo gjë duket brenda parametrave.
Lini një Përgjigje