FLASH
Shkruar nga Pamfleti
Bajerni i Mynihut dha një sinjal të qartë para fillimit të sezonit të ri, duke mposhtur me rezultatin bindës 4-0 kampionët e Ligës së Europës, Totenhemin, në një ndeshje miqësore të zhvilluar në “Allianz Arena”.
Ndonëse ishte një përballje përgatitore, atmosfera ishte e ngrohtë dhe tifozët bavarezë kishin mbushur shkallët e stadiumit për të parë ekipin e tyre. Bajerni nuk zhgënjeu: që në minutat e para, ekipi vendosi ritmin e ndeshjes.
Goli i parë erdhi në minutën e 12. Herri Kejn përfitoi nga një pasim i gjatë i Majkëll Olize, kontrolloi bukur dhe dërgoi topin në këndin e poshtëm të majtë, duke tundur rrjetën e ish-ekipit të tij.
Vetëm pak minuta më vonë, Bajerni fitoi një penallti pas një faulli të Zhoao Palinjas ndaj Josip Stanisiç, por Kejn gaboi nga pika e bardhë duke rrëshqitur dhe dërguar topin mbi tra.
Pas një pjese të parë të balancuar në fundin e saj, Bajerni riktheu dominimin në pjesën e dytë. Olize dhe Kejn u kombinuan bukur në minutën e 50, por traversa i mohoi golin e dytë sulmuesit anglez. Portieri Vikario bëri disa pritje të rëndësishme për Totenhemin, por nuk mundi të ndalte gjithçka.
Në minutën e 60, Kingsli Koman shënoi një gol të bukur pasi u shërbye nga Konrad Laimer, i cili fitoi topin dhe tregoi pjekuri duke asistuar në vend që të gjuante vetë. Ishte vetëm fillimi i spektaklit.
Me ndryshimet e shumta të trajnerit Kompani, në minutat e fundit në skenë dolën të rinjtë. 17-vjeçari Lenart Karl shënoi një gol të bukur pas një depërtimi magjik të Luis Díaz në krahun e majtë. Vetëm gjashtë minuta më pas, edhe një tjetër talent, Jonah Kusi-Asare, shënoi një perlë nga krahu i djathtë, duke vulosur rezultatin përfundimtar në 4-0.
Lini një Përgjigje