FLASH
Shkruar nga Pamfleti
Presidenti i Serbisë, Aleksandar Vuçiç ka refuzuar propozimin e kryeministrit të Shqipërisë, Edi Rama për Asociacionin e komunave serbe në Kosovë.
Ai ka thënë se e respekton kryeministrin Rama por që nuk është i autorizuar të hartojë statutin e Asociacionit të komunave me shumicë serbe.
Vuçiç ka thënë se Rama nuk është anëtar i Ekipit Menaxhues dhe kësisoj nuk mund të bëjë draf-statut për Asociacionin.
“Me sa di unë, Edi Rama nuk është anëtar i Ekipit Menaxhues Serb. As kryeministri i Kosovës, Albin Kurti, i cili duket se dëshiron të bëhet pjesë e atij ekipi, pasi edhe ai ka diçka të shkruar, por nuk ka të drejtë ta ketë të shkruar.
Nuk kemi çfarë të negociojmë këtu. Na jepni vetëm parimet dhe organet e Asociacionit siç janë negociuar dhe siç e kam inicializuar në vitin 2015 me (në atë kohë kryeministrin e Kosovës) Isa Mustafa. Nuk kërkojmë asgjë më shumë. A e dini se kur do të jetë? Asnjëherë, sigurisht jo derisa Kurti është në pushtet.", ka thënë Vuçiç, shkruan media serbe Danas.
Kryeministri Rama në një konferencë për shtyp të enjten e kaluar deklaroi se ka i ka dërguar një draft për Asociacionin i realizuar me ekspertë të huaj, përfshi edhe amerikanë, liderëve të Gjermanisë dhe Francës.
Ai theksoi se draftin nuk e kishte konsultuar me kryeministrin Albin Kurti.
Deklarata e Ramës ngjalli reagime në Shqipëri dhe Kosovë. Ish-kryeministri Sali Berisha tha se teksti ishte shkruar në Beograd, ndërsa ish-ministri i Jashtëm i Kosovës, Enver Hoxhaj, mbështeti qëndrimin e Ramës për këtë çështje.
Vetë Albin Kurti nuk është deklaruar për këtë prerazi, por ditën e nesërme do të jetë takimi i parë mes dy kryeministrave në Gjakovë pas propozimit të Ramës.
Sipas axhendës, takimet mes dy qeverive do të nisin në ora 11:00, kur edhe pritet të mbërrijë delegacioni i Qeverisë së Shqipërisë në Gjakovë.
Ndërkohë edhe ditën e djeshme në festën e 32-vjetorit të PS, Rama e ka shfrytëzuar rastin për të sulmuar Albin Kurtin dhe kritikët e tij në Kosovë.
Rama sulmoi ashpër ata që i dolën kundër, duke deklaruar se duan të luajnë luftash.
“Ata që e kanë kundërshtuar pa ditur përmbajtjen si në Prishtinë e Beograd duke thënë nuk duhet të dëgjojnë propozim nga Shqipëri, u them 2 gjëra. Së pari, ata që flasin kështu jetojnë me komunizmin në kokë kur politika merrej me kush e tha dhe jo se çfarë tha. Vërtet ata vendosin për veten, por ky rajon nuk është i tyri, por dhe i joni. Nëse atyre u vjen më për mbarë të luajnë luftash një treçerek shekulli pasi lufta ka mbarur, ndërkohë që asnjëra palë dhe tjetra nuk i hapin dot as luftë njëra-tjetrës, por as të shtëna. Sepse aty është NATO. Aleatëve po u soset durimi sepse duan paqen finale. Unë ju them jo që nuk jemi të interesuar për atë lojë luftash, por jemi kundër asaj loje luftash”, tha Rama.
Lini një Përgjigje