FLASH
Shkruar nga Pamfleti
Ministri i Brendshëm, Ervin Hoxha ka deklaruar se ditën e sotme do i përcjellë Këshillit të Ministrave kandidaturën për Drejtor të Përgjithshëm të Policisë së Shtetit.
Edhe pse ka 5 ditë që gara për përzgjedhjen e drejtorit të Përgjithshëm të Policisë së Shtetit ka përfunduar, ende nuk është bërë zyrtar emri i drejtorit të ri.
Në një deklaratë për mediat, ministri Hoxha ka theksuar se Ministria e Brendshme do të publikojë sot renditjen e kandidatëve për Drejtorin e Policisë në faqen zyrtare.
'Hapi garën për përcaktimin dhe përzgjedhjen e Drejtorit të Përgjithshëm të Policisë së Shtetit. Ky proces ishte shumë konkurrues në bazë të meritave dhe të integritetit, i monitoruar nga 2 misionet që asistojnë Policinë e Shtetit. Sot, Ministria e Brendshme do të publikojë renditjen në faqen e saj zyrtare dhe unë do i përcjell Kryeministrit, Këshillit të Ministrave kandidaturën për Drejtor të Përgjithshëm.', tha ministri.
Në garën për postin e Drejtorit të Policisë së Shtetit aplikuar 15 kandidatë, por 4 prej tyre, konkretisht: Shemsi Premci, Ibrahim Disha, Hajrulla Xhivini dhe Sami Rasha, u përjashtuan, pasi sipas ministrit të Brendshëm nuk plotësonin kriteret sipas ligjit të ri.
Ndërsa janë katër kandidatët më të favorizuar për tu emëruar si Drejtor i Përgjithshëm i Policisë së Shtetit.
Ata janë drejtori i Policisë së Elbasanit, Ilir Proda, drejtori i Policisë Kriminale Neritan Nallbati, drejtori i Policisë së Durrësit Skënder Hitaj dhe zv. drejtorin e Policisë së Lezhës, Altin Mema.
Ndërkohë ministri i ri i Brendshëm njoftoi se Sokol Bizhga është aktualisht drejtori i komanduar i Policisë së Shtetit, pas largimit nga posti i Muhamet Rrumbullakut, i cili dha dorëheqjen.
Lini një Përgjigje