FLASH
Shkruar nga Pamfleti
Deputeti Dashamir Shehi deklaroi se opozita shqiptare mund të vijë në pushtet vetëm përmes figurave të reja.
Sipas tij, Lulzim Basha ka humbur në tre palë zgjedhje, ndërsa shprehu mospëlqimin e tij si lider. Shehi tha se secili politikan ka ciklin e tij.
“Basha ka marrë tezat e mia, që unë kam 1 vit që i kam dorëzuar në Parlament. Nuk më inspirojnë shumë, pasi kanë qenë pjesë e këtij sistemi. Shqipëria nuk është banko-provë, ka qenë në tre palë zgjedhje që i humbi. Po ashtu edhe bashkëpunëtor i ngushtë i Berishës, ndaj nuk më pëlqen. Duhet të ndryshojmë me njerëz, ide etj, por Basha le t’i tregojë. Nuk më pëlqen për lider. Gjykoj që çdo gjë bën ciklin e vet dhe duhet mbyllur, siç ndodhi me Berishën”, tha Shehi për Report TV.
Po ashtu Dashamir Shehi theksoi se qeveria e Edi Ramës duhet të mbyllë mandatin dhe të largohet, pasi sipas tij, kryeministri nuk ka çfarë të sjellë ndryshe në vend.
“Rama është më i dobët se kurdoherë, do të largohet këtë herë. I ka bërë ditët e veta. Besoj se çfarë ka thënë edhe raporti i DASH, mjaft realist, Amerika e njeh mirë politikën shqiptare. E mira e opozitës është të gjejë një grup dhe trajektore të re”, shtoi ai.
Gjithashtu Shehi risolli në vëmendje edhe raportin e DASH, ndërsa shtoi se populli dhe ndërkombëtarët duhet të rrëzojnë këtë sistem të korruptuar.
“DASH po ashtu ka folur për Berishën dhe Metën, opozita ta gjejë trajektoren e vetë, që të vijë në pushtet. Rama nëse ka bërë qeverisje të mirë të qëndronte, por është i korruptuar. 4 ministra në burg, 4 në arrati, po të gërmosh gjen dhe më shumë. Këta bëjnë sikur nuk kuptojnë dhe nuk dinë gjë. Ky sistem është i korruptuar dhe duhet të ikë. Populli dhe ndërkombëtarët do ta rrëzojnë. Meta dhe Berisha nuk e rrëzojnë, populli duhet të gjejë njerëz dhe figura të reja edhe me mbështetjen e opinionit ndërkombëtar”, theksoi Shehi.
Lini një Përgjigje