FLASH
Shkruar nga Pamfleti
Detaje të reja janë bërë publike në lidhje me vdekjen e papritur të aktores së njohur turke Ece İrtem, e cila humbi jetën në moshën 35-vjeçare, vetëm një ditë pas festimit të ditëlindjes së saj.
Sipas mediave turke, Instituti i Mjekësisë Ligjore ka përfunduar raportin paraprak të ekspertizës. Dokumenti nuk ka evidentuar shenja dhune, helmimi apo trauma në trupin e aktores, ndërsa hetuesit po shqyrtojnë mundësinë që vdekja të jetë shkaktuar nga një atak kardiak. Megjithatë, autoritetet theksojnë se shkaku përfundimtar do të përcaktohet vetëm pas publikimit të raportit të plotë të autopsisë.
Pas vdekjes së saj më 15 qershor, Prokuroria ka nisur një hetim për të sqaruar të gjitha rrethanat e ngjarjes. Avokati i familjes, Uğur Gökkoyun, ka deklaruar se aktorja ndërroi jetë në banesën e saj gjatë orëve të paradites dhe se çdo pistë po verifikohet nga organet kompetente.
Në dosjen hetimore janë përmendur edhe disa pretendime, sipas të cilave Ece İrtem mund të ketë qenë nën trajtim me antidepresantë dhe një natë para vdekjes të ketë konsumuar alkool së bashku me medikamente me recetë. Deri në këtë fazë të hetimit, këto informacione nuk janë konfirmuar zyrtarisht nga autoritetet.
Një tjetër pistë që është kërkuar të hetohet lidhet me një kafshim të mundshëm majmuni gjatë një udhëtimi të aktores në Tajlandë. Avokati i familjes ka bërë të ditur se në trupin e saj janë vërejtur disa shenja, ndërsa ka kërkuar që ekspertët të verifikojnë nëse ato mund të kenë shkaktuar komplikacione shëndetësore. Edhe kjo hipotezë mbetet në fazën e verifikimit.
Ndërkohë, avokati ka mohuar deklaratat që i janë atribuar nënës së aktores në disa media, duke sqaruar se ajo ndodhet ende në gjendje të rënduar emocionale dhe nuk ka dhënë asnjë deklaratë zyrtare.
Hetimet për vdekjen e Ece İrtem vijojnë, ndërsa autoritetet pritet të hedhin dritë mbi shkakun e saktë të ndarjes së saj nga jeta pas përfundimit të ekspertizës mjeko-ligjore.
Lini një Përgjigje