FLASH
Shkruar nga Pamfleti
Gjykata e Apelit në Romë rrëzon dënimin me burgim të përjetshëm për Raul Esteban Calderon, i konsideruar si vrasës me pagesë i karteleve të drogës në kryeqytetin italian
“U shpall i pafajshëm sepse nuk e ka kryer faktin.” Me këtë vendim, Gjykata e Apelit në Romë ka përmbysur dënimin me burgim të përjetshëm ndaj Raul Esteban Calderon, i njohur edhe me emrin Gustavo Alejandro Musumeci, i akuzuar për vrasjen e Fabrizio Piscitelli-t, të njohur si “Diabolik”, ish-lider ultras dhe figurë e njohur në trafikun e drogës në Romë.
Calderon ishte dënuar në shkallën e parë për vrasje me paramendim, por gjyqtarët e apelit vlerësuan se provat e paraqitura nga prokuroria nuk janë të mjaftueshme për të konfirmuar fajësinë e tij.
Në qendër të procesit ishte videoja e atentatit të ndodhur më 7 gusht 2019 në Via Lemonia, pranë Parkut të Ujësjellësve në Romë. Në pamje, Piscitelli shihet ulur në një stol pranë truprojës së tij, kur një person i veshur si vrapues afrohet dhe qëllon ndaj tij pa ndalur vrapin. Sipas gjykatës, cilësia e dobët e filmimit nuk lejon identifikimin e sigurt të autorit dhe pamjet nuk mund të përdoren si provë bindëse, as nga policia shkencore.
Prokuroria e Përgjithshme kishte kërkuar konfirmimin e burgimit të përjetshëm me agravanten e metodës mafioze. Hetuesit kishin sjellë gjithashtu në gjyq përgjime nga ambientet e trafikantëve shqiptarë të drogës në zonën Monte Spaccato, ku dëgjohej shprehja: “Argjentinasi e vrau Diabolikun, e di gjithë Roma.” Edhe këto përgjime u konsideruan të pamjaftueshme për të mbështetur dënimin maksimal.
Elementi kryesor i akuzës mbetej dëshmia e ish-partneres së Calderonit, Rina Bussone, tashmë bashkëpunëtore e drejtësisë. Ajo kishte deklaruar në prokurori se Calderon i kishte rrëfyer vrasjen dhe se krimi ishte kryer me një pistoletë 9x21 Parabellum, armë e vjedhur gjatë një grabitjeje në një argjendari. Arma nuk është gjetur kurrë. Bussone pretendonte gjithashtu se kishte njohur në video bluzën dhe pantallonat e shkurtra të përdorura nga Calderon. Megjithatë, gjyqtarët e shkallës së dytë e konsideruan dëshmitaren jo plotësisht të besueshme.
Krejt tjetër është situata për një tjetër vrasje mafioze. Calderon është dënuar në shkallë të parë dhe të dytë me burgim të përjetshëm për ekzekutimin e Selavdi Shebait, trafikant shqiptar droge i njohur me nofkën “Passerotto”, i vrarë më 20 shtator 2020 në plazhin e Torvaianicës. Sipas hetimeve, vrasja ishte kryer kundrejt pagesës prej 150 mijë eurosh. Me të njëjtin dënim është goditur edhe Giuseppe Molisso, i njohur si “Barba”, i akuzuar si bashkëpunëtor në krim.
Në vitin 2025, autoritetet arrestuan në Abu Dhabi shqiptarin Altin Sinomati, i konsideruar si porositësi i vrasjes.
Sipas hetuesve italianë, Calderon ka ndërtuar prej vitesh një profil të rëndësishëm në botën kriminale të Romës. I njohur edhe me nofkën “Francisco”, ai dyshohet se mori pjesë në atentatin ndaj vëllezërve Emanuele dhe Alessio Costantini, djem të figurës kriminale të njohur si “er Verdura”, gjatë një sulmi të armatosur në lagjen Alessandrino në korrik 2021.
Autoritetet e konsiderojnë Calderonin krahun e armatosur të organizatave të trafikut të drogës dhe armëve të lidhura me Giuseppe Molisso dhe Leandro Bennato, i njohur si “il Biondo”. Ky grup kriminal përplaset prej vitit 2018 me klanin e Michele Senese, i njohur si “o Pazzo”, një figurë historike e mafies napolitane me bazë në zonën Casilino të Romës.
Në një tjetër hetim mbi grupet e reja kriminale që dolën në skenë pas skandalit “Mafia Capitale”, Calderon përmendet si pjesë aktive në trafikun e sasive të mëdha të kokainës që hynin në Itali. Sipas dosjeve hetimore, ai kishte shpërndarë dhjetëra kilogramë drogë për figura të ndryshme të botës kriminale romake.
Pas vendimit të Apelit, çështja për vrasjen e “Diabolikut” rikthehet praktikisht në pikën zero, ndërsa mbeten ende shumë hije mbi një nga atentatet më të bujshme të viteve të fundit në Itali.
Lini një Përgjigje