FLASH
Shkruar nga Pamfleti
Pas disa ditësh tensioni të lartë pas vrasjes së Alex Pretti në Minneapolis dhe dërgimit të "carit të kufirit" Tom Homan në terren, Presidenti Donald Trump ka lëshuar një sinjal të ri: është i hapur për të ulur numrin e agjentëve federalë në Minnesota, nëse ka bashkëpunim nga autoritetet lokale. Lajmi u konfirmua nga zyra e guvernatorit demokrat Tim Walz, pas një telefonate që të dy palët e përshkruan si “produktive” dhe “në të njëjtin frekuencë”.
Sipas deklaratës së publikuar nga zyra e Walz, Trump ka pranuar të diskutojë me Departamentin për Sigurinë Kombëtare mundësinë që hetimi për incidentin e Pretti-t të kalojë nën drejtimin e Byrosë për Hetime Kriminale të Minnesota-s (BCA). Njëkohësisht, ai ka shprehur gatishmëri për një qasje më të koordinuar në çështjen e zbatimit të ligjit për emigracionin, duke përmendur nevojën për fokusim tek “kriminelët e dhunshëm”.
Por, pavarësisht këtij momenti qetësie diplomatike, Shtëpia e Bardhë vijon të sulmojë ashpër drejtuesit lokalë demokratë. Zëdhënësja Karoline Leavitt akuzoi publikisht guvernatorin Walz dhe kryebashkiakun e Minneapolis Jacob Frey për “rezistencë armiqësore” ndaj bashkëpunimit me agjencitë federale si ICE. Sipas saj, “agjentët federalë janë penguar të kryejnë detyrën nga protestues të majtë, të nxitur pikërisht nga këta liderë”.
Në lidhje me vendimin për të dërguar Tom Homan në terren, Leavitt theksoi se ky nuk ishte një sinjal mungese besimi ndaj Sekretares së Sigurisë Kombëtare Kristi Noem. “Presidenti ka besim të plotë tek Noem, ajo vazhdon të mbikëqyrë të gjithë departamentin dhe operacionet e emigracionit në shkallë kombëtare”, tha ajo, duke shtuar se Homan do të jetë "personi kyç në qetësimin e situatës në rrugët e Minneapolis".
Por ndonëse Trump shprehu gatishmëri për bashkëpunim me hetimin shtetëror për vrasjen e Pretti-t, nuk ka bërë ende asnjë zotim konkret për të njohur juridiksionin e autoriteteve të Minnesotës. I pyetur për këtë, Leavitt u përgjigj se presidenti “do të diskutojë” me zyrtarët, por “nuk ka dhënë asnjë angazhim”.
Në një koment të drejtpërdrejtë për të drejtën për të filmuar agjentët e ICE dhe për të mbajtur armë, zëdhënësja tha se Trump mbështet Amendamentin e Parë dhe të Dytë, por theksoi se “askush nuk ka të drejtë kushtetuese për të penguar zbatimin e ligjit”. Ajo paralajmëroi se “çdo person që përballet me forcat e rendit me armë, duhet të jetë i vetëdijshëm për rrezikun që sjell ky akt”.
Në sfond të kësaj krize të re, SHBA përballet me një debat gjithnjë e më të ashpër mbi kontrollin e kufirit, përplasjet midis autoriteteve federale dhe lokale, dhe frikën e përshkallëzimit të dhunës urbane në prag të zgjedhjeve presidenciale të 2026. Me këtë veprim të fundit, Trump po përpiqet të mbajë nën kontroll narrativën e ligjit dhe rendit, por nuk e fsheh se në të njëjtën kohë po e përdor situatën për të goditur rivalët demokratë dhe për të forcuar imazhin e tij si "shpëtimtar i Amerikës së rrënuar nga kaosi".
Nëse tensionet nuk qetësohen së shpejti, Minneapolis mund të bëhet një prej zonave kyçe ku përcaktohet fati politik i 2026-ës.
Lini një Përgjigje