FLASH
Shkruar nga Pamfleti
Përshkallëzimi i fundit ka rritur ndjeshëm frikën se konflikti mund të dalë jashtë kontrollit, duke tërhequr potencialisht Iranin, mbështetësin kryesor të Hezbollahut, si dhe Shtetet e Bashkuara.
Një valë sulmesh ajrore izrealite ka goditur periferitë jugore të Bejrutit, që kishte në shënjestër liderin e Hezbollahut, Hassan Nasrallah.
Nuk kishte asnjë konfirmim të menjëhershëm për fatin e Nasrallah pas sulmeve të rënda të së premtes, por një burim i afërt me Hezbollahun i tha Reuters se ai nuk është prekur.
Autoritetet shëndetësore libaneze konfirmuan gjashtë të vdekur dhe 91 të plagosur në sulmin fillestar të premten. Numri duket se do të rritet më shumë. Më shumë se 700 njerëz u vranë në sulmet gjatë javës së kaluar, thanë autoritetet.
Ministria libaneze e shëndetësisë tha se gjashtë persona u vranë dhe 91 u plagosën në sulmin e së premtes, ndërsa disa vlerësime të hershme thonë se numri i të vdekurve ishte 300.
Disa blloqe apartamentesh në lagjen Haret Hreik u shndërruan në rrënoja, dhe pamjet nga vendi i ngjarjes treguan pllaka të mëdha betoni të mbuluara nga grumbuj metali dhe rrënoja. Disa kratere ishin të dukshme, në njërin prej të cilëve kishte rënë një makinë.
Ushtria izraelite më herët urdhëroi banorët e Bejrutit jugor të evakuoheshin dhe paralajmëroi se po planifikonte të godiste tre ndërtesa specifike në zonë. Forcat e Mbrojtjes të Izraelit (IDF) postuan një hartë të zonave të caktuara të Dahiyeh dhe thanë se banorët "ishin të detyruar të evakuonin ndërtesat menjëherë dhe të largoheshin prej tyre në një distancë prej jo më pak se 500 metra".
Mediat izraelite raportuan se sulmi në Bejrut ishte një përpjekje për të vrarë Hassan Nasrallah por grupi libanez nuk ka bërë ende një deklaratë.
Hezbollahu u përgjigj me sulmin e Izraelit në Bejrut duke bombarduar Safed, një qytet në veri të Izraelit, me një raketë "në përgjigje të sulmeve izraelite ndaj qyteteve, fshatrave dhe civilëve". Grupi militant i mbështetur nga Irani njoftoi më shumë sulme në Karmiel dhe Sa'ar. Izraeli u përgatit për një hakmarrje të mundshme nga Hezbollahu në Liban, si dhe nga Jemeni dhe Irani, duke u kërkuar banorëve të Lartësive Golan, Safed dhe Merom HaGalil të qëndrojnë pranë zonave të mbrojtura.
Ushtria izraelite pretendoi se kishte vrarë komandantin e njësisë raketore të Hezbollahut në Libanin jugor, Muhammad Ali Ismail dhe zëvendësin e tij, Hossein Ahmed Ismail, në sulmet me avionë luftarakë. IDF tha gjithashtu në X se "me ta u eliminuan komandantët dhe terroristët e tjerë të Hezbollahut".Qindra familje u larguan nga periferitë jugore të Bejrutit gjatë natës deri të shtunën pas sulmeve dhe paralajmërimeve të Izraelit për evakuim.
Joe Biden, presidenti i SHBA-së, ka udhëzuar Pentagonin që të “vlerësojë dhe përshtatë sipas nevojës” forcat amerikane në Lindjen e Mesme, tha Shtëpia e Bardhë pas sulmeve të së premtes në Bejrut. Biden më herët të premten tha se SHBA "nuk kishte njohuri apo pjesëmarrje" në sulm.
Lini një Përgjigje