FLASH
Shkruar nga Pamfleti
Rasti i zgjedhjeve të fundit në Slloveni tregon për një operacion të dyshuar ndikimi në proces, përmes regjistrimeve të fshehta dhe identiteteve të rreme…
Një avion biznesi nga Tel Avivi u ul në këtë vend të qetë alpin në një natë të ftohtë dhjetori të kaluar, duke transportuar dy operativë nga një kompani izraelite e inteligjencës që kritikët e kanë përshkruar si “Mossadi privat”.
Sipas autoriteteve, dy burrat udhëtuan me një makinë me shofer drejt selisë së partisë opozitare populiste të djathtë në Slloveni. Banorët e zonës u bënë dyshues për shkak të gjuhës së huaj që flisnin dhe i raportuan tek një gazetar lokal dhe policia.
Këtë muaj, shërbimi inteligjent i Sllovenisë nisi kontakte me agjenci të tjera europiane për të identifikuar vizitorët dhe për të zbardhur një mister që ka jehonë nga Ukraina në Izrael e deri te lufta me Iranin.
Sipas zyrtarëve sllovenë, burrat po planifikonin të ndikonin mbi zgjedhjet e mbajtura të dielën, duke tentuar të diskreditonin partinë në pushtet Lëvizja për Liri, e cila ka mbështetur hapur palestinezët dhe ka qëndruar fort në mbështetje të Ukrainës, me synimin për ta rrëzuar nga pushteti.
Në fund, megjithëse shumica e sondazheve parashikonin humbje për Lëvizjen për Liri, ajo arriti të fitojë me një diferencë të ngushtë ndaj Partisë Demokratike Sllovene të së djathtës ekstreme. Të hënën, politikanët e saj u shprehën të bindur se mund të formojnë qeverinë.
Rezultatet erdhën pas një fushate gjatë së cilës u publikuan video që pretendonin të tregonin persona pranë Lëvizjes për Liri duke diskutuar mënyra për të anashkaluar rregullat e lobimit ose për të keqpërdorur fondet publike.
Qeveria thotë se këto video u organizuan nga vizitorët e dhjetorit, të cilët i identifikoi përmes të dhënave të aeroportit si Giora Eiland, ish-kreu i Këshillit të Sigurisë Kombëtare të Izraelit, dhe Dan Zorella, ish-oficer i inteligjencës ushtarake izraelite.
Eiland, gjeneral-major në pension, është këshilltar i Black Cube, një kompani izraelite e njohur për operacione vëzhgimi për klientë si Harvey Weinstein dhe ish-presidenti i Kongos Joseph Kabila. Zorella është themelues i kompanisë.
Black Cube nuk iu përgjigj kërkesave për koment. Edhe Ministria e Jashtme e Izraelit refuzoi të komentojë.
Qeveria sllovene nuk bëri të ditur se kush dyshohet se e ka punësuar Black Cube, por tha se beson se kontrata “ka origjinën në Slloveni”.
Udhëheqësi i opozitës, Janez Jansa, fillimisht u tha gazetarëve se nuk kishte dijeni për Black Cube. Më vonë ai tha se ishte takuar me Eiland, por nuk e mbante mend se kur. Në një deklaratë për The Wall Street Journal, ai tha: “regjistrime të tjera priten në ditët në vijim”, pa dhënë detaje.
Partia e tij deklaroi se “duhet të ngrihet një monument në mes të Lubjanës për kompaninë (agjencinë apo çfarëdo që të jetë) Black Cube.”
Partia në pushtet e ktheu fushatën në një referendum mbi Black Cube dhe botën e errët të spiunëve me pagesë që ajo simbolizon. Qeveritë europiane u rreshtuan në mbështetje të Sllovenisë, duke dënuar ndërhyrjen e huaj.
“Sllovenia ka qenë viktimë e ndërhyrjes së qartë, dezinformimit dhe veprimeve nga vende të treta,” tha presidenti francez Emmanuel Macron javën e kaluar, pasi kryeministri slloven Robert Golob ngriti shqetësimin për fushatën e dyshuar shpifëse para liderëve europianë.
Pozicionimet politike
Lëvizja për Liri është pozicionuar si një nga kritikët më të zëshëm të Izraelit në Europë. Në vitin 2024, ajo njohu shtetin palestinez, duke zemëruar Tel Avivin dhe duke vendosur një precedent që më pas u ndoq nga fuqi më të mëdha europiane.
Ndërkohë, opozita sllovene është zotuar ta tërheqë njohjen e Palestinës dhe të zhvendosë ambasadën e Sllovenisë në Izrael në Jerusalem.
Opozita synon gjithashtu të afrojë vendin me Hungarinë e kryeministrit nacionalist Viktor Orban dhe, në mënyrë të tërthortë, me administratën Trump, e cila ka shprehur mbështetje për të djathtën europiane.
Jansa, i cili ka shërbyer më parë tri mandate si kryeministër, është aleat i afërt i Orbanit. Ky i fundit ka bllokuar përdorimin e rreth 100 miliardë dollarëve të aseteve ruse të ngrira në Europë për mbrojtjen dhe rindërtimin e Ukrainës.
Orbán pritet të takohet këtë javë me nënpresidentin JD Vance përpara zgjedhjeve të prillit në Hungari, ku sondazhet janë shumë të ngushta. Fitorja e tij në vitin 2018 u ndihmua nga një operacion i Black Cube, i cili regjistroi fshehurazi figura të opozitës, materiale që më pas u publikuan në media të kontrolluara nga qeveria, sipas raportimeve të mëparshme të gazetës.
Operacioni i dyshuar
Zyrtarët sllovenë thonë se operativët e dyshuar të Black Cube përdorën maskime dhe u paraqitën si investitorë që kërkonin të ndërtonin qendra të të dhënave. Ata ftuan figura publike pranë qeverisë në hotele luksoze në Vjenë, Londër dhe Zagreb, nga dhjetori në shkurt.
Më vonë, fragmente të shkurtra nga këto biseda u publikuan në një faqe interneti të hapur këtë muaj. Ato dukeshin sikur tregonin këta persona duke diskutuar mënyra për të ushtruar ndikim të paligjshëm dhe sjellje të tjera të papërshtatshme. Opozita i paraqiti si prova të “korrupsionit të përmasave të paimagjinueshme”.
Agjencia shtetërore franceze Viginum, e cila monitoron ndërhyrjet e huaja, ndihmoi në analizimin e pamjeve nga kamerat e sigurisë, sipas burimeve të njohura me çështjen.
Operacionet e mëparshme të Black Cube
Black Cube doli në qendër të vëmendjes në vitin 2017, kur një punonjëse e saj u paraqit si aktiviste për të drejtat e grave dhe regjistroi fshehurazi një aktore në emër të producentit Harvey Weinstein, si pjesë e përpjekjeve për të penguar akuzat për sulm seksual.
Kompania përdor taktika tipike të shërbimeve të inteligjencës, si kufizimi i informacionit për projekte vetëm në ekipe të vogla. Dy anëtarë të bordit të saj këshillimor kanë qenë ish-drejtues të Mossad-it. Operativët e saj janë lidhur gjithashtu me përpjekje për të mbledhur informacione komprometuese ndaj Alexei Navalnyt dhe me një skemë për të frikësuar shefen rumune të antikorrupsionit.
Në Hungari, në vitin 2018, organizata dhe individë të lidhur me biznesmenin George Soros u kontaktuan nga agjentë me identitete të rreme, u ftuan në hotele dhe u regjistruan fshehurazi. Regjistrimet u montuan në mënyrë që të krijonin përshtypjen e gabuar se ai mbështeste fuqishëm vendosjen masive të refugjatëve.
Orbán iu referua vazhdimisht këtyre publikimeve në ditët e fundit para se të fitonte bindshëm zgjedhjet. Operacioni u ekspozua më vonë si një aktivitet i Black Cube, pasi dy nga operativët u identifikuan në fotografi dhe u lidhën me kompaninë.
Rasti në Slloveni
Në Slloveni, operacioni i dyshuar synoi rreth gjashtë persona, sipas autoriteteve. Një nga rastet nisi me një mesazh në LinkedIn nga Daniel Hewitt, një rekrutues i pavarur, i cili shkroi se klientë nga Londra po shqyrtonin mundësi financimi për qendra të të dhënave në Ballkan.
I kontaktuar nga The Wall Street Journal, Hewitt tha se nuk kishte dijeni për ndonjë lidhje mes klientit të tij dhe Black Cube. “Kjo është shqetësuese, është hera e parë që dëgjoj për këtë,” tha ai, duke shtuar se do të ndërpriste bashkëpunimin.
Dominika Svarc Pipan, ish-ministre e Drejtësisë dhe figurë pranë qeverisë aktuale, tha se fillimisht ishte dyshuese për kontaktin. Ajo kishte dhënë dorëheqjen pothuajse dy vjet më parë pas një blerjeje të diskutueshme të një godine shtetërore me çmim të lartë, por kishte mohuar çdo shkelje dhe nuk ishte akuzuar.
Pas disa shkëmbimeve, ajo pranoi një telefonatë në Zoom me një fond investimi të quajtur Stockard Capital dhe më pas një takim në hotelin Park Hyatt në Vjenë.
Ajo tha se dy burrat që e takuan pretendonin se ishin biznesmenë çekë dhe amerikanë, por akseti i tyre i dukej i çuditshëm. Megjithatë, ajo mendoi se ishin investitorë të papërgatitur, pasi bënin pyetje bazike për politikën sllovene.
Gjatë disa takimeve, përfshirë një në një restorant luksoz në Austri, ata kërkonin të kuptonin qëndrimin e qeverisë. Sipas saj, ata e shtynin të sugjeronte një ryshfet. Në një rast, ajo vuri re se pagesa prej rreth 500 eurosh u bë në para në dorë.
Më 11 mars, ajo u njoftua se video të shkurtra me të ishin publikuar online me titullin “Aktivitetet lobuese të Dominika Svarc Pipan”. Pak më vonë, faqja e Stockard Capital nuk ekzistonte më.
Ajo deklaroi se nuk kishte pranuar të bënte lobim dhe se vetëm kishte ofruar të testonte interesin e shtetit për projektin dhe të jepte këshilla standarde biznesi.
Të mërkurën, ajo tha se gjeti tubin e shkarkimit të makinës së saj të bllokuar me poliuretan. Policia sllovene po heton rastin.
Ky raport i The Wall Street Journal paraqet pretendimet e autoriteteve sllovene. Deri tani, Black Cube nuk ka reaguar publikisht ndaj këtyre akuzave. /Përshtati Pamfleti/
Lini një Përgjigje