FLASH
Shkruar nga Pamfleti
Një seri episodesh të dhunshme në Shtetet e Bashkuara përfshin tentativa për atentat ndaj Donald Trump, një vrasje politike dhe një incident të fundit me armë në Uashington, që përfshiu edhe Shërbimin Sekret.
Ngjarja më e afërt në kohë ndodhi në Hotel Hilton në kryeqytet, gjatë Darkës së Korrespondentëve të Shtëpisë së Bardhë. Të shtënat me armë detyruan evakuimin e sallës dhe aktivizimin e menjëhershëm të protokolleve të sigurisë. Një agjent i Shërbimit Sekret mbeti i plagosur. Ndërhyrja e shpejtë shmangu përshkallëzimin e situatës në një sulm me pasoja më të gjera.
Këto zhvillime pasojnë një varg rastesh që kanë pasur në shënjestër Donald Trump. Në korrik 2024, gjatë një tubimi elektoral në Butler të Pensilvanisë, ai u qëllua ndërsa ndodhej në skenë. Sulmi nuk pati pasoja fatale për të.
Në shtator të po atij viti, një tjetër tentativë u regjistrua në klubin e tij të golfit në West Palm Beach. Trump ndodhej mes vrimës së pestë dhe të gjashtë në momentin kur një agjent i Shërbimit Sekret identifikoi tytën e një arme që dilte nga gardhi. Agjenti reagoi duke hapur zjarr, çka detyroi personin e armatosur të largohej. Ai u arrestua më vonë nga autoritetet.
Një incident tjetër ndodhi në shkurt 2026 në Mar-a-Lago. Një burrë hyri gjatë natës në kompleks, i pajisur me një pushkë dhe një bidon me benzinë. Forcat e sigurisë, në bashkëpunim me policinë lokale të Palm Beach, u përballën me të. Pas refuzimit për të dorëzuar armët dhe rezistencës së tij, efektivët e qëlluan për vdekje. Trump nuk ndodhej në rezidencë në atë moment.
Në shtator 2025, një tjetër episod i rëndë preku skenën politike. Aktivisti konservator Charlie Kirk u vra gjatë një takimi me studentë në kampusin e Universitetit të Utah Valley. Ai u qëllua nga një distancë prej disa dhjetëra metrash ndërsa ishte në bisedë me të pranishmit.
Vdekja e tij u rikujtua edhe gjatë Darkës së Korrespondentëve të Shtëpisë së Bardhë, ku ishte e pranishme bashkëshortja e tij, Erika Kirk. Ngjarja në Uashington ndërpreu aktivitetin dhe solli evakuimin e pjesëmarrësve.
Seria e këtyre episodeve tregon një vijimësi incidentesh të armatosura që përfshijnë figura politike dhe aktivitete publike në Shtetet e Bashkuara, ndërsa autoritetet vijojnë hetimet për secilin rast.
Lini një Përgjigje