FLASH
Shkruar nga Pamfleti
Evropa po përjeton një nga valët më të hershme dhe më intensive të të nxehtit të viteve të fundit, me temperatura rekord, viktima dhe alarme të ngritura në disa vende të kontinentit.
Meteorologët ia atribuojnë fenomenin një të ashtuquajturi "kupolë termike", një sistem i fuqishëm presioni të lartë që ka bllokuar masat e nxehta ajrore nga Afrika e Veriut mbi Evropën Perëndimore. Fenomeni pengon qarkullimin normal të ajrit dhe ka çuar temperaturat deri në 10-15 gradë Celsius mbi mesataren sezonale.
Britania e Madhe është ndër vendet më të prekura. Autoritetet raportojnë 11 viktima të lidhura me temperaturat e larta, ndërsa Londra regjistroi deri në 35,1 gradë Celsius, niveli më i lartë i shënuar ndonjëherë për muajin maj. Vendi po përballet gjithashtu me net tropikale, ku temperaturat nuk zbresin nën 20 gradë Celsius edhe gjatë natës.
Në Francë, dhjetëra departamente, përfshirë rajonin e Parisit, janë vendosur në alarm portokalli. Autoritetet kanë raportuar shtatë viktima, ndërsa temperaturat në disa zona kanë arritur deri në 39 gradë Celsius. Masa emergjente janë vendosur edhe në rajonin Île-de-France për të kufizuar ndotjen dhe efektet e të nxehtit ekstrem.
Edhe Spanja po përballet me temperatura tipike të mesit të verës. Në Andaluzinë jugore dhe në disa rajone të tjera, termometri po lëviz mes 37 dhe 40 gradëve Celsius. Në qytetin Badajoz u regjistrua për herë të parë një temperaturë mbi 38 gradë Celsius gjatë muajit maj, rekord që nuk ishte shënuar në më shumë se shtatë dekada matjesh.
Portugalia regjistroi temperaturën më të lartë të matur ndonjëherë për muajin maj, me 40,3 gradë Celsius, duke thyer rekordin e mëparshëm të vitit 2001. Ndërkohë, në Itali, Ministria e Shëndetësisë ka shpallur alarm të kuq në Romë, Firence, Bolonjë dhe Torino, duke paralajmëruar se kushtet meteorologjike paraqesin rrezik jo vetëm për grupet e ndjeshme, por edhe për popullsinë e shëndetshme.
Parashikimet tregojnë se vala e të nxehtit mund të zgjerohet edhe drejt Evropës Juglindore në ditët e para të qershorit. Modelet e Qendrës Evropiane për Parashikime Afatmesme (ECMWF) tregojnë një probabilitet të lartë për depërtimin e masave shumë të ngrohta ajrore nga Afrika e Veriut drejt Ballkanit dhe Mesdheut Lindor.
Sipas meteorologëve, Greqia, Ballkani dhe zona të tjera të Evropës Juglindore mund të përjetojnë temperatura dukshëm mbi normat klimatike të fillimit të qershorit. Megjithatë, ekspertët theksojnë se bëhet fjalë për parashikime afatmesme dhe se intensiteti i saktë i fenomenit do të përcaktohet nga të dhënat e ditëve në vijim.
Ndërsa maji po mbyllet me temperatura ekstreme në pjesën më të madhe të kontinentit, ekspertët paralajmërojnë se Evropa mund të hyjë në një verë me episode të shpeshta të të nxehtit ekstrem dhe kushte atmosferike gjithnjë e më të vështira.
Lini një Përgjigje