FLASH
Shkruar nga Pamfleti
Rusia thotë se kafshët do të ndihmojnë në rikthimin e popullatës së tigrave në Azinë Qendrore...
Rusia i ka dorëzuar Kazakistanit katër tigra Amur, mes tyre dy këlyshë, për të ndihmuar vendin të rikthejë popullatën e këtyre kafshëve. Presidenti rus Vladimir Putin e bëri të ditur këtë në një artikull të publikuar para vizitës së tij në Kazakistan këtë javë.
Kazakistani, i pasur me burime energjetike dhe minerale kritike, ndan kufi me Rusinë dhe mbetet aleat i afërt i Moskës në një rajon ku Kina dhe Shtetet e Bashkuara po zgjerojnë gjithashtu ndikimin e tyre.
Putini tha në faqen e Kremlinit se katër tigrat u kapën në rajonin Khabarovsk, në Lindjen e Largët të Rusisë, dhe u transportuan me avion drejt Kazakistanit. Sipas tij, kafshët pritet të lëshohen së shpejti në natyrë.
Presidenti rus ka përdorur edhe më parë kafshët si pjesë të diplomacisë. Në vitin 2022, Rusia i dërgoi Koresë së Veriut 30 kuaj race gri, në një kohë kur dy vendet forcuan lidhjet pas nisjes së luftës në Ukrainë. Udhëheqësi koreano-verior Kim Jong Un njihet si i apasionuar pas kalërimit.
Kazakistani po përpiqet të rikthejë popullatën e tigrave në Azinë Qendrore dhe e konsideron tigrin Amur si të afërm të tigrave Kaspikë, tashmë të zhdukur. Dhurata ruse shton numrin e tigrave që Kazakistani ka marrë më parë nga Holanda.
Gjatë vizitës, Putini pritet të mbikëqyrë nënshkrimin e një marrëveshjeje për një projekt energjie bërthamore në Kazakistan, vend që aktualisht nuk prodhon energji bërthamore. Kremlini ka njoftuar se palët do të diskutojnë edhe për rritjen e transitit të naftës ruse drejt Kinës përmes territorit kazak.
Lini një Përgjigje