FLASH
Shkruar nga Pamfleti
Asambleja e qytetarëve të Novi Pazarit, letër Erdoganit të mos gënjehet nga Vuçiç...
Afrimi mes presidentit serb Aleksandar Vuçiç dhe homologut të tij turk Recep Tayyip Erdogan po shihet me dyshim dhe pakënaqësi në Sanxhak, ku përfaqësues të shoqërisë civile akuzojnë Beogradin se po e shfrytëzon mbështetjen e liderit turk për të konsoliduar pushtetin në një vit zgjedhor.
Pas vizitës së Vuçiçit në Ankara dhe paralajmërimit për një vizitë të Erdoganit në Serbi, asambleja e qytetarëve të Novi Pazarit njoftoi sot se i ka dërguar një letër Presidentit të Turqisë, Recep Tayyip Erdogan, për të treguar se marrëdhëniet diplomatike dhe bashkëpunimi ekonomik nuk duhet të përdoren për të rritur artificialisht vlerësimin e regjimit që "zbaton represion sistemik në Sanxhak".
Në reagimin e tyre, qytetarët theksojnë kontrastin mes retorikës zyrtare për partneritet strategjik dhe realitetit në terren. “Ndërsa në takimet zyrtare flitet për miqësi dhe investime, në Novi Pazar përjetojmë izolim ekonomik, presion ndaj të rinjve, ndërhyrje në jetën fetare dhe përçarje të qëllimshme politike”, thuhet në deklaratë.
Sipas tyre, për më shumë se tri dekada rajoni nuk ka parë investime madhore që do të garantonin punësim dhe zhvillim, ndërsa infrastruktura e dobët e mban të shkëputur nga pjesa tjetër e vendit. Ata akuzojnë pushtetin në Beograd se ka thelluar ndarjet brenda komunitetit boshnjak dhe ka ndërhyrë në institucionet fetare dhe politike për të dobësuar unitetin.
Në këtë kontekst, afrimi me Erdoganin shihet si një lëvizje e llogaritur politike. Kritikët argumentojnë se Vuçiçi kërkon të përfitojë nga imazhi dhe ndikimi i presidentit turk mes votuesve myslimanë, duke krijuar përshtypjen e një mbështetjeje ndërkombëtare që forcon pozitat e tij të brendshme.
Për shumë analistë, bashkëpunimi mes dy liderëve, të cilët shpesh cilësohen si figura me prirje autoritare, ngre pikëpyetje për drejtimin demokratik të rajonit. Sipas tyre, kur diplomacia përdoret për qëllime elektorale, rrezikon të zëvendësojë debatin mbi reformat reale me spektakël politik.
Ndërsa Beogradi e paraqet partneritetin me Turqinë si pragmatik dhe ekonomik, në Sanxhak mbizotëron shqetësimi se vizitat dhe deklaratat e përbashkëta mund të shërbejnë më shumë për konsolidimin e pushtetit sesa për zgjidhjen e problemeve strukturore të rajonit. /Pamfleti
Per keto dy e paraardhesit e tyre Shqiperia ka qene plaçke..KÇK. Pse jemi ne kete gjendje...Turko/Sllavet kane e patur e do kemi ndikim te perçarjen dhe shkaterrimin e Shqiperise. Ne jemi ne europe, drejtojme e punojme akoma me metoda turk sllave.