FLASH
Shkruar nga Pamfleti
Kremlini ka hedhur poshtë akuzat e ngritura nga Britania e Madhe dhe disa aleatë të saj se lideri i opozitës ruse, Alexei Navalny, është helmuar me një substancë të përshkruar si “helm bretkose” gjatë kohës që vuante dënimin në një burg rus në vitin 2024.
Zëdhënësja e Ministrisë së Jashtme ruse, Maria Zakharova, deklaroi se pretendimet përbëjnë një “fushatë dezinformuese nga Perëndimi”. Ajo theksoi se pa publikimin e rezultateve laboratorike dhe formulave të substancave të dyshuara, akuzat mbeten të pabazuara.
“Duhet të ketë rezultate analizash dhe formula të substancave. Pa këtë, të gjitha deklaratat janë pjesë e një fushate që synon të largojë vëmendjen nga problemet e Perëndimit”, u shpreh Zakharova.
Edhe Ambasada e Rusisë në Mbretërinë e Bashkuar ka mbajtur të njëjtin qëndrim. Në një reagim zyrtar, ambasada deklaroi se akuzat nuk përbëjnë një përpjekje për drejtësi, por një përdorim politik të çështjes.
“Ky nuk është një kërkim për drejtësi, por një instrumentalizim i një rasti tragjik. Edhe pas vdekjes së një qytetari rus, Londra dhe disa kryeqytete evropiane vazhdojnë ta përdorin çështjen për qëllime politike”, thuhet në reagim.
Autoritetet britanike dhe disa vende perëndimore kanë kërkuar sqarime të plota dhe hetim të pavarur lidhur me rrethanat e vdekjes së Navalnyt. Moska i ka mohuar vazhdimisht akuzat dhe i ka cilësuar ato si të motivuara politikisht.
Lini një Përgjigje