FLASH
Shkruar nga Pamfleti
Pavarësisht embargos amerikane ndaj naftës dhe ndërprerjeve të gjata të energjisë elektrike, jeta në Havanë vazhdon në dukje normalisht. Megjithatë, situata mund të përkeqësohet.
Pas sulmit të Shteteve të Bashkuara ndaj Venezuelës dhe rrëmbimit të presidentit Nicolás Maduro, Karakasi ndërpreu furnizimin me naftë për Kubën, aleatin e tij kryesor. Në fund të janarit, presidenti amerikan Donald Trump e shpalli Kubën “kërcënim të veçantë për sigurinë kombëtare të SHBA-së” dhe paralajmëroi tarifa ndaj çdo vendi që vazhdon ta furnizojë ishullin me naftë ose derivate.
Presidenti kuban Miguel Díaz-Canel i cilësoi masat si “kriminale dhe gjenocidale”, por deklaroi se Kuba është e gatshme për dialog me SHBA-të “pa parakushte”. Ai mohoi se regjimi është pranë kolapsit dhe paralajmëroi një plan për forcimin e sektorit energjetik.
Në terren, qytetarët shprehen të shqetësuar. Benzina shpërndahet vetëm kundrejt valutës së huaj dhe pas pritjesh të gjata në radhë. Ndërprerjet e energjisë, që zgjasin nga 10 deri në 15 orë në ditë, janë bërë të zakonshme edhe në kryeqytet. Aktualisht, vendi prodhon vetëm rreth 40% të energjisë së nevojshme.
Sipas Bert Hofman, studiues në institutin gjerman GIGA që ndodhet në Havanë, vendi po jeton në një “normalitet krize”. “Jeta vazhdon, edhe pse me më pak karburant dhe më shumë ndërprerje të energjisë. Gjithçka përkeqësohet gradualisht”, tha ai, duke shtuar se normaliteti është i brishtë, pasi Kuba nuk ka perspektivë të qartë për furnizim të qëndrueshëm me naftë.
Lini një Përgjigje