FLASH
Shkruar nga Pamfleti
Marash Kumbulla po lë pas një nga periudhat më të vështira të sezonit të tij në Spanjë me Majorkën, pas një serie dëmtimesh që e mbajtën larg fushave për disa muaj.
Mbrojtësi i Kombëtares shqiptare u dëmtua fillimisht në shtator, duke munguar deri në fund të dhjetorit. Megjithatë, rikthimi i tij nuk zgjati shumë, pasi në janar pësoi një tjetër dëmtim, duke e zgjatur periudhën e mungesës dhe duke ndikuar ndjeshëm në vazhdimësinë e tij në kampionat.
Së fundmi, duket se kjo fazë e vështirë është tejkaluar. Kumbulla u rikthye në fushë gjatë fundjavës, duke marrë disa minuta në fitoren e Majorkës ndaj Rajo Vajekanos. Aktivizimi i tij u konsiderua një sinjal pozitiv për gjendjen fizike, duke lënë të kuptohet se problemet shëndetësore janë drejt zgjidhjes.
Në kampin e Majorkës ka optimizëm për një rikthim të plotë të mbrojtësit, i cili pritet të japë më shumë siguri në repartin difensiv në javët në vijim. Megjithatë, sipas zhvillimeve aktuale, gjasat që klubi spanjoll të blejë përfundimisht kartonin e tij nga Roma mbeten të ulëta.
Kujtojmë se Kumbulla zhvilloi një sezon pozitiv me Espanjolin një vit më parë, ndërsa ky edicion është karakterizuar nga vështirësi dhe mungesa të shumta për shkak të dëmtimeve.
Lini një Përgjigje