FLASH
Shkruar nga Pamfleti
Tre trajnerë të njohur të futbollit evropian, Çabi Alonso, Jurgen Klop dhe Enzo Mareska, pritet të jenë protagonistë të merkatos së verës, teksa emrat e tyre lidhen me disa nga klubet më të mëdha në kontinent. Të tre janë aktualisht të lirë, çka ka shtuar spekulimet për lëvizje të bujshme në pankina.
Situata te Reali i Madridit dhe pista Klop
Në Madrid, pozicioni i trajnerit Arbeloa mbetet i pasigurt. Burime pranë klubit sugjerojnë se një sezon pa trofe mund të çojë në moskonfirmimin e tij në krye të ekipit. Me titullin në La Liga që konsiderohet pothuajse i humbur dhe me shanset e reduktuara në Champions League pas humbjes 2-1 ndaj Bajernit të Mynihut, drejtuesit e klubit po shqyrtojnë alternativa.
Në këtë kontekst, emri i Jurgen Klop ka rikthyer forcë në diskutimet brenda klubit. Gjermani, i cili aktualisht nuk është aktiv si trajner, por mbetet i angazhuar në role të tjera, shihet si një preferencë e vjetër e presidentit Florentino Perez.
Liverpuli mes rikthimit të Klop dhe opsionit Alonso
Paralelisht, edhe Liverpul po monitoron situatën e Klop, me raportime mediatike që flasin për një rikthim të mundshëm të tij në “Anfield Road”. Kjo lëvizje lidhet me të ardhmen e trajnerit aktual Arne Slot, për të cilin thuhet se e ka të përcaktuar largimin.
Një tjetër emër në orbitën e Liverpulit është Çabi Alonso. Ish-mesfushori i njohur, aktualisht pa skuadër pas largimit nga Reali i Madridit, kishte qenë një alternativë edhe më herët për të zëvendësuar Klop. Megjithatë, në atë kohë, ai kishte zgjedhur të vazhdonte projektin e tij te Bajer Leverkusen.
Mareska dhe e ardhmja te Mançester Siti
Në listën e trajnerëve të përfolur është edhe Enzo Mareska. Tekniku italian u largua nga Çelsi pas një periudhe të suksesshme, ku fitoi Ligën e Konferencës dhe Botërorin për Klube. Prej kohësh, ai konsiderohet si një nga kandidatët potencialë për të pasuar Pep Guardiola në stolin e Mançester Sitit.
Megjithatë, Guardiola mbetet nën kontratë deri në vitin 2027, çka e bën çdo lëvizje të mundshme një çështje afatmesme dhe jo të menjëhershme.
Lini një Përgjigje