FLASH
Shkruar nga Pamfleti
Luis Enrike ka zbuluar se synon t’i japë fund karrierës së tij si trajner përpara se të mbushë 60 vjeç. Tekniku i PSG-së e bëri këtë deklaratë në një intervistë për mediat spanjolle, ku foli për planet e tij personale dhe mënyrën se si e sheh të ardhmen në futboll.
Trajneri asturian u shpreh se nuk dëshiron të shndërrohet në figurën klasike të trajnerit që vazhdon të qendrojë në pankinë në moshë të avancuar. Sipas tij, është e rëndësishme të dijë momentin e duhur për t’u larguar nga profesioni.
Luis Enrike tregoi gjithashtu se këtë çështje e ka diskutuar edhe në familje, duke përmendur një “pakt” ironik me vëllain e tij më të vogël, Felipe, i cili punon si nëpunës dhe planifikon të dalë në pension në moshën 61-vjeçare.
“I them gjithmonë se duhet të dal në pension përpara tij, kështu që bëjini vetë llogaritë”, deklaroi trajneri i PSG-së.
Megjithatë, ai nuk e përjashtoi plotësisht mundësinë që të vazhdojë më gjatë nëse do të ketë ende motivimin dhe energjinë e nevojshme. Luis Enrike theksoi se vazhdimi i karrierës përtej moshës 60-vjeçare, sipas këndvështrimit të tij aktual, mund të ishte një gabim vlerësimi.
Lini një Përgjigje