FLASH
Shkruar nga Pamfleti
Sekretari i Përgjithshëm i Kombeve të Bashkuara, Antonio Guterres, ka shprehur shqetësim për sulmet ajrore të Izraelit në Bejrut, duke paralajmëruar se ato mund të rrezikojnë përpjekjet diplomatike për arritjen e një marrëveshjeje mes Shteteve të Bashkuara dhe Iranit.
Në një deklaratë zyrtare, Guterres theksoi se sulmet ndodhën në një moment veçanërisht delikat për rajonin, pavarësisht armëpushimit që ishte në fuqi.
“Sulmet ndodhën pavarësisht armëpushimit dhe në një kohë kur Shtetet e Bashkuara dhe Republika Islamike e Iranit pritet të arrijnë një marrëveshje që do t’i hapë rrugën një zgjidhjeje paqësore të këtij konflikti”, deklaroi kreu i OKB-së.
Ai u bëri thirrje të gjitha palëve të shmangin veprimet që mund të përshkallëzojnë situatën dhe të ruajnë hapësirën për dialog.
“U bëj thirrje të gjitha palëve të tregojnë përmbajtje maksimale në këtë moment vendimtar dhe shpresoj fuqimisht për një rezultat të suksesshëm të përpjekjeve të vazhdueshme nga SHBA-të dhe Irani”, shtoi Guterres.
Deklarata e sekretarit të përgjithshëm vjen në një kohë kur komuniteti ndërkombëtar po ndjek me vëmendje zhvillimet në Lindjen e Mesme, mes frikës se tensionet mes Izraelit, Iranit dhe aleatëve të tyre mund të minojnë përpjekjet për një zgjidhje diplomatike.
Lini një Përgjigje