FLASH
Shkruar nga Pamfleti
Legjenda e futbollit italian, Alesandro Del Piero, ka reaguar ashpër pas dështimit të radhës së Italisë për t’u kualifikuar në Kampionatin Botëror, duke e cilësuar situatën si alarmante për gjithë lëvizjen futbollistike në vend. Ish-sulmuesi i “Axurrëve”, kampion bote në vitin 2006 dhe autor i 95 ndeshjeve me kombëtaren në periudhën 1995–2008, nuk i ka kursyer kritikat për gjendjen aktuale.
Duke folur në emisionin “Sky Calcio Unplugged”, Del Piero shprehu hapur emocionet e tij negative pas humbjes së mundësisë për kualifikim, duke iu referuar edhe disfatës së 31 marsit në Zenica.
“Ka shumë ndjesi negative; trishtim, zemërim, zhgënjim… herën e parë ishte një shok, hera e dytë një makth, e treta e turpshme për t’u justifikuar,” u shpreh ai.
Ai theksoi se përgjegjësia nuk bie mbi një individ të vetëm, duke përmendur emra si Gattuso, Buffon apo Gravina, por problematika është më e thellë.
“Jemi shumë prapa, jo vetëm standardeve tona, por edhe atyre që kanë nisur nga e para si Franca apo Gjermania, që me kurajo kanë ndërmarrë rrugë të reja. Sot për sot, zgjidhjet duken shumë larg,” shtoi Del Piero.
“Duhet të rifillojmë nga e para”
Sipas ish-kapitenit të Juventusit, e vetmja rrugëdalje është një rifillim i plotë, me angazhim nga të gjithë aktorët e futbollit italian.
“Çdokush nga ne duhet të ketë dëshirën për të reaguar dhe për të rinisur gjithçka nga e para, të rihyjë në lojë, të studiojë e të punojë për të zgjidhur gjërat me entuziazëm,” deklaroi ai.
Reformë e thellë, jo zgjidhje individuale
Del Piero kundërshtoi idenë që kriza mund të zgjidhet me ndryshime të pjesshme apo me një figurë të vetme në krye.
“Besoj te loja në skuadër. Nuk duhet të ketë kurban dhe nuk duhet të presim që një person i vetëm të zgjidhë gjithçka,” tha ai.
Ai ngriti shqetësime për disa nga problemet kryesore të sistemit:
mungesat në ekipet e moshave
infrastruktura dhe stadiumet
niveli i investimeve
“Duhet analizuar çfarë nuk shkon te futbolli i meshkujve, sepse futbolli i vajzave dhe sportet e tjera po bëjnë gjëra të jashtëzakonshme,” shtoi ai.
Humbja e identitetit dhe nevoja për përulësi
Një tjetër element që Del Piero theksoi është humbja e lidhjes me futbollin lokal dhe traditën.
“Duhet të bëjmë një hap prapa dhe të pranojmë që nuk jemi më më të mirët, madje nuk jemi as të dytët apo të tretët. Duhet lënë krenaria mënjanë, duhet përulësi,” u shpreh ai.
Nevoja për projekte afatgjata
Në përfundim, Del Piero nënvizoi se zgjidhja nuk lidhet vetëm me financat, por me ndërtimin e një strategjie afatgjatë.
“Nuk është vetëm çështje parash; duhen projekte me hapa që duhen respektuar. Duhet kohë,” tha ai, duke sjellë shembuj konkretë: “Falë kohës, Gasperini te Atalanta u bë i pavdekshëm. Ançeloti te Juventusi dukej trajneri më i dobët në botë, por nuk është kështu.”
Ai e mbylli me një mesazh të qartë për zhvillimin e lojtarëve:
“Futbollistët nuk ndërtohen, por formohen dhe ndihmohen të arrijnë nivelet më të larta.”
Lini një Përgjigje